बापरे! नागाच्या चुंबनाचा प्रयत्न सर्पमित्राच्या जिवावर बेतला; युवकाच्या ओठांवर...

कॅफेचालक त्याचा मित्र असल्याने आणखी ३ मित्रांसमवेत कॅफेच्या वर बिल्डिंगच्या गच्चीवर नागेश हा मित्रांसमोर नाग घेऊन गेला.

नाशिक - सर्पमित्राने नागाला शिताफीनं पकडले खरे, मात्र नागाने सर्पमित्राच्या ओठांनाच दंश केल्यानं त्याच त्याचा प्राण गेल्याची घटना सिन्नर शहरात शुक्रवारी सायंकाळी सहाच्या सुमारास घडली. नागाचे चुंबन घेण्याचे धाडस करणाऱ्या सर्पमित्राच्याच ओठांना नागाने दंश केल्यानं जीव गमवावा लागल्याची घटना सिन्नरमध्ये घडली. 

नागेश श्रीधर भालेराव (३२, धारणकर गल्ली, सिन्नर) असे मृत सर्पमित्राचे नाव आहे. नागेश हा वेल्डिंग वर्कशॉपमध्ये काम करण्याबरोबर होर्डिंग चिकटवण्याचे काम करायचा. शुक्रवारी एका ठिकाणी पकडलेला नाग त्याने सिन्नर महाविद्यालयासमोरील एका कॅफेमध्ये आणला. कॅफेचालक त्याचा मित्र असल्याने आणखी ३ मित्रांसमवेत कॅफेच्या वर बिल्डिंगच्या गच्चीवर नागेश हा मित्रांसमोर नाग घेऊन गेला. यावेळी नागाचे चुंबन घेण्याच्या प्रयत्नात नागानेच नागेशच्या ओठांना दंश केला. 

यावेळी तो बेशुद्ध पडला ही बाब त्याच्या मित्रांच्या लक्षात येताच त्यांनी तातडीने रुग्णवाहिका बोलावून त्याला उपचारासाठी नाशिक जिल्हा रुग्णालयात दाखल केले. मात्र दरम्यानच्या काळात नागेशच्या संपूर्ण शरीरात नागाचे विष भिनल्याने त्याचा मृत्यू झाला. शोकाकुल वातावरणात या सर्पमित्रावर अंत्यसंस्कार करण्यात आले.