मुंबईच्या नागपाड्यातून आयएसआय एजंटला अटक

मुंबईतल्या नागपाड्यातून अल्ताफ कुरेशी नावाच्या एका आयएसआय एटंजला बेड्या ठोकल्या आहेत.

ऑनलाइन लोकमत
मुंबई, दि. 3 - मुंबईतल्या नागपाड्यातून अल्ताफ कुरेशी नावाच्या एका आयएसआय एटंजला बेड्या ठोकल्या आहेत. महाराष्ट्र आणि उत्तर प्रदेश एटीएसने संयुक्तपणे ही कारवाई केली असून, त्याच्याकडून 70 लाख रुपयांची रोकड जप्त केली आहे. या आयएसआय एजंटला 70 लाख रुपये एवढा पैसा हवालामार्फत मिळाल्याची प्राथमिक माहिती समोर आली आहे. उत्तर प्रदेश दहशतवादविरोधी पथक आणि राज्यातील गुप्तचर यंत्रणा आणि लष्कराच्या यंत्रणांनी संयुक्त कारवाई करत रकमेसह आयएसआयच्या एजंटला अटक केली आहे. अल्ताफ कुरेशी हा पाकिस्तानी गुप्तचर यंत्रणेसाठी हवाला ऑपरेटर म्हणून काम करायचा. उत्तर प्रदेशातील फैजाबादमधून अटक केलेला आयएसआयच्या संशयित असलेल्या अफताब अली यालाही अल्ताफ कुरेशी पैसे पुरवायचा, अशी माहिती आता समोर आली आहे.

गेल्या काही तासांपूर्वीच फैजाबाद येथून पाकिस्तानची गुप्तहेर संघटना आयएसआयच्या एजंट आफताब अलीलाही अटक करण्यात आली होती. याशिवाय एका संशयितालाही ताब्यात घेण्यात आलं आहे. आफताब अली हा फैजाबादमधील ख्वासपुरा येथील रहिवासी आहे.

आफताब अली याने आयएसआयकडून हेरगिरीचे प्रशिक्षण घेतल्याचं वृत्त असून तो पाकिस्तानी उच्चायुक्तालयातील अधिकाऱ्यांच्या संपर्कात होता अशी माहिती आहे. आफताबला कोर्टात हजर करण्यात येणार असून त्यानंतर पुढील कारवाई केली जाईल. तसेच यापुढील काळात आणखी काही संशयितांना अटक होण्याची शक्यता आहे. दहशतवादविरोधी पथक आणि राज्यातील गुप्तचर यंत्रणा आणि लष्कराच्या यंत्रणांनी संयुक्त कारवाईकरून त्याला आज अटक केली. तो पाकिस्तानी उच्चायुक्तालयातील अधिकाऱ्यांच्या संपर्कात होता आणि खोट्या नावाने त्यांच्याशी संपर्क साधत होता, अशी माहिती समोर आहे. आफताब अली पाकिस्तानचा व्हिसा मिळवण्याचा प्रयत्न करत होता. मात्र, अनेकदा त्याचा अर्ज फेटाळून लावला होता. त्याने आयएसआयसाठी काम करणार असल्याचे सांगितल्यानंतर त्याला व्हिसा मिळाला होता, असे एटीएसच्या सूत्रांनी सांगितले.