इसिसला आता थेट मुंबईतूनच फंडिंग; एटीएसचा शोध सुरू

मालवणीतील चार तरुण इसिसमध्ये भरती होण्यासाठी गेले होते.

मनीषा म्हात्रे,

मुंबई- मालवणीतील चार तरुण इसिसमध्ये भरती होण्यासाठी गेले होते. त्यापाठोपाठ सीएसटी परिसरातील हॉकरकडून इसिससाठी निधी गोळा केला जात असल्याची धक्कादायक माहिती समोर येत आहे. गोवंडीतील एका महिलेने याविरुद्ध आवाज उचलला. मात्र प्रकरण दाबण्यासाठी पोलिसांकडूनच दबाब आणण्यात येत आहे. त्यामुळे न्याय कोणाकडे मागावा, असा प्रश्न त्यांच्यासमोर उभा ठाकला आहे. याप्रकरणी एटीएसकडूनही तपास सुरु करण्यात आला आहे.
मालवणीतले चार तरुण ‘इस्लामिक स्टेट आॅफ इराक अ‍ॅन्ड सीरियामध्ये (इसिस) दाखल होण्यासाठी गेले. त्यापैकी तिघांना परत आणण्यास तपास यंत्रणेला यश आले. तसेच तपास यंत्रणेने राज्यातील इसिसचे जाळे नष्ट करण्यासाठी मोठ्या प्रमाणात धडक कारवाई राबविली. त्यामुळे गेले काही दिवस हे प्रकरण थंडावले होते. दरम्यान सीएसटी परिसरात बसणाऱ्या फेरीवाल्यांकडून इसिससाठी निधी गोळा केला जात असल्याची माहिती गोवंडीतील यास्मीन शेख या महिलेने उघडकीस आणली. यास्मीन यांचाही या परिसरात गॅस लायटर विक्रीचा व्यवसाय आहे. त्यानुसार गेल्या वर्षभरापासून शब्बीर शेख नावाचा इसम हा इसिसचा महाराष्ट्र प्रमुख असल्याचे सांगून निधी गोळा करत असल्याचे त्यांनी ‘लोकमत’ला सांगितले.
प्रत्येक फेरीवाल्याकडून दिवसाला ४०० ते ५०० रुपये उकळले जात असल्याचेही त्यांनी स्पष्ट केले. पैसे न दिल्यास मारझोड करुन खोट्या गुन्ह्यात अडकविण्याची भीती दाखवली जात असल्याचे यास्मीन यांचे म्हणणे आहे. मात्र शब्बीरच्या या दहशतीविरुद्ध यास्मीन यांनी आवाज उचलल्याची माहिती पोलिसांना दिली. हाच राग मनात धरत शब्बीरने शेख कुटुंबियांना मारझोड करत त्रास देण्यास सुरुवात केली.
गेल्या सहा महिन्यांत पोलिसांनी केवळ अदखलपात्र गुन्ह्यांची नोंद करत हात वर केल्याचा आरोप शेख करत आहेत. शब्बीर शेखचे देशी दारुचे दुकान असल्याची माहितीही समोर आली आहे. हे प्रकरण दाबण्यासाठी शब्बीर साध्या गणवेशातील पोलिसांसोबत यास्मिनच्या घरी येतो. शिवाय खोट्या गुन्ह्यांत अडकविण्याची भीती घालून ५० हजारांची मागणी करत असल्याचेही यास्मिन यांनी सांगितले.
याबाबतही त्यांनी पोलीस नियंत्रण कक्षास देखील माहिती दिली आहे. मात्र पुन्हा असे पोलीस आल्यास चौकशी करु, असा सल्ला यास्मीन यांना देण्यात आला.
अखेर उपोषणाचा मार्ग
शबीरची वाढती भीती त्यात पोलिसांकडून मिळत असलेल्या असहकार्यामुळे शेख कुटुंबियांनी उपोषणाचा मार्ग स्वीकारला आहे. यास्मीन या पती सय्यद आणि पाच वर्षांची मुलगी माहेनूरसह गेल्या तीन दिवसांपासून आमरण उपोषणासाठी बसल्या आहेत. रविवारी त्यांची प्रकृति जास्त खालावल्याने त्यांना रुग्णालयात दाखल करण्यात आले होते.
सोमवारी सकाळी रुग्णालयातून डिस्चार्ज मिळाल्यानंतर त्या पुन्हा उपोषणाला बसल्या आहेत. जोपर्यंत आम्हाला न्याय मिळत नाही, तोपर्यंत आम्ही येथून हटणार नसल्याचे त्यांचे म्हणणे आहे. सर्वांना भीती आहे, मात्र आवाज उठविण्यासाठी सगळेच घाबरत असल्याचे तिचे म्हणणे आहे.या प्रकरणी माहिती घेऊन चौकशी करण्यात येत असल्याचे एटीएसच्या वरिष्ठ अधिकाऱ्याने ‘लोकमत’शी बोलताना सांगितले.
>तक्रारदार महिलाच दोषी : तक्रारदार महिला ३२६ गुन्ह्यांत आरोपी आहे. याप्रकरणी तिच्या विरोधात आरोपपत्र देखील दाखल आहेत. दरम्यान तिच्या तक्रारीनुसार संबंधित इसमावर कारवाई करण्यात आली होती. त्यात जवळपास पाच ते सहा तक्रारी तिच्या पतीविरुद्ध आहेत. त्याच्यावर कारवाई करु नये, म्हणून सदर महिला खोटी माहिती पुरवित असल्याचे एमआरए मार्ग पोलीस ठाण्याचे वरीष्ठ निरीक्षक सुखलाल वर्पे यांनी सांगितले.
>तब्बल चार तक्रारी दिल्या: गेल्या सहा महिन्यांत यास्मीन यांनी शिवाजी नगर, एमआरए मार्ग पोलीस ठाण्यात तब्बल ४ तक्रारी दिल्या आहेत. पोलिसांनी केवळ अदखलपात्र गुन्ह्यांची नोंद करत हातवर केल्याचा आरोप शेख करत आहेत. प्रकरण दाबण्यासाठी शब्बीर साध्या गणवेशातील पोलिसांसोबत यास्मिनच्या घरी येतो
माझा काही संबंध नाही
मला इसिस बाबत काहीही माहिती नाही. मी कुणाकडूनही पैसे उकळलेले नाही. यास्मीनच माझ्याविरोधात खोटी माहिती पसरवित आहे. मी वडापावचा धंदा चालवून माझ्या कुटुंबियांचा उदर्निवाह करतो.
या महिलेच्या भितीने आम्ही दुसरीकडे रहायला आलो अशी माहिती शब्बीर शेखने लोकमतशी बोलताना दिली. अनेकदा खोट्या तक्रारी करुन तिने पोलिसांच्याही नाकीनऊ आणले आहे. त्यामुळे या महिलेवरच कारवाई होणे गरजेचे असल्याचे शेखचे म्हणणे आहे.