सनातनच्या अभय वर्तकांविरोधात जितेंद्र आव्हाडांची पोलीसांकडे तक्रार

राष्ट्रवादीचे नेते जितेंद्र आव्हाड आणि सनातन संस्थेचे प्रवक्ते अभय वर्तक यांच्यामध्ये टीव्हीवरील एका चर्चासत्रात झालेला वाद पोलीस स्टेशनात पोचल्याचे वृत्त आहे

ऑनलाइन लोकमत

मुंबई, दि. १९ - राष्ट्रवादीचे नेते जितेंद्र आव्हाड आणि सनातन संस्थेचे प्रवक्ते अभय वर्तक यांच्यामध्ये टीव्हीवरील एका चर्चासत्रात झालेला वाद पोलीस स्टेशनात पोचल्याचे वृत्त आहे. जितेंद्र आव्हाडांनी पोलीस ठाण्यात वर्तकांविरुद्ध तक्रार दाखल केली आहे. या तक्रारी संदर्भातील तपशील अद्याप समजलेला नाही.

पानसरे खूनप्रकरणात समीर गायकवाडला झालेली अटक आणि सनातनवर असलेली संशयाची सुई यासंदर्भातील एका वृत्तवाहिनीवरील चर्चेत आव्हाड व वर्तक सहभागी झाले होते. यावेळी दोघेही आक्रमकपणे एकमेकांचा प्रतिवाद करत होते. अर्थात, दोघांपैकी कुणीही एकमेकाला धमकावल्याचे दिसत नसले तरी दोघांमधील वाद विवाद शिगेला पोचला होता. नेहमीच्या कार्यक्रमाप्रमाणे नंतर या वादावर पडदा पडल्याचे दिसून आलेले नाही तर आव्हाडांनी पोलीस ठाण्यात वर्तकांविरोधात तक्रार दाखल करण्यात त्याचे पर्यवसान झाले आहे.

आव्हाड, हे कसलाही इतिहासाचा आधार न घेता संत महंतांसंदर्भात वाट्टेल ते आरोप करतात असं वर्तक यांचं म्हणणं होतं, तर सनातनसारख्या संस्था इतिहास विपरीत करून सांगतात असा आव्हाडांचा मुद्दा होता. अशा प्रश्नावर या प्रकारच्या भूमिका ठणकावून याआधीही दोन्ही बाजुंच्या लोकांनी अनेकदा मांडल्या आहेत, परंतु पोलीस ठाण्यात तक्रार करण्याची वेळ कधी आली नव्हती.