एसटीत होणार जम्बो भरती, १५ हजार रिक्त जागा

एसटी महामंडळात येत्या काही महिन्यात जम्बो भरती केली जाण्याची शक्यता आहे. गेल्या दोन वर्षात महामंडळात रिक्त जागाच भरल्या न गेल्याने तब्बल १५ हजार रिक्त जागा निर्माण झाल्या आहेत.

ऑनलाइन लोकमत
मुंबई, दि. १९  - एसटी महामंडळात येत्या काही महिन्यात जम्बो भरती केली जाण्याची शक्यता आहे. गेल्या दोन वर्षात महामंडळात रिक्त जागाच भरल्या न गेल्याने तब्बल १५ हजार रिक्त जागा निर्माण झाल्या आहेत. यात चालक, वाहकांच्या रिक्त जागा मोठ्या प्रमाणात आहेत. या जागा भरण्यासाठी एसटी महामंडळाने भरती प्रक्रिया राबविणाऱ्या कंपनीशीही बोलणी सुरु केली आहे.
२0१४ मध्ये एसटी महामंडळात मोठी भरती झाली होती. त्यानंतर महामंडळात भरती प्रक्रीया झाली नाही. दोन वर्षात एकही जागा भरली न गेल्याने मोठ्या प्रमाणात जागा रिक्त झाल्या. एसटी महामंडळासाठी वर्ग-१ ते वर्ग-४ साठी १ लाख २६ हजार ११५ जागा मंजुर असून यात १ लाख ४ हजार ३९८ मुष्यबळच सध्या कार्यरत आहे. हे पाहता एकूण २२ हजार २४ हजार जागा रिक्त असून यामध्ये ६ हजार ९0२ ही बढतीतील पदे तर १५ हजार १२२ सरळ सेवेतील परिक्षा घेऊन भरण्यात येणाऱ्या पदांचा समावेश आहे. यात बढती प्रक्रीयेतील पदे भरण्याचे काम एसटी महामंडळाकडून सुरु आहे. सरळ सेवेत असणाऱ्या पदांमध्ये चालक, वाहकांसह कारागिर, सहाय्यक कारगिर यांची पदे मोठी असल्याचे महामंडळातील सूत्रांकडून सांगण्यात आले. सध्या ३६ हजार ७३२ चालक असून आणखी २ हजार ९७७ चालकांची गरज आहे. तर ३४ हजार ८0७ वाहक कार्यरत असून आणखी ३ हजार ९६३ वाहकांची कमतरता महामंडळाला भासत आहे. कारागिर, सहाय्यक कारागिर यांचीही ५ हजारपेक्षा जास्त पदे तर हेल्परसह वर्ग-४ मधील अन्य काही पदेही रिक्त असल्याचे सूत्रांनी सांगितले. ही सर्व पदे लवकरच भरली जाणार असून त्यासाठी भरती प्रक्रीया राबवणाऱ्या एका कंपनीला त्याचे काम दिले जाईल. यासाठी निविदा प्रक्रीयाही सुरु असल्याची माहिती देण्यात आली. कंपनीची नेमणूक होताच भरती प्रक्रीयेसाठीही जाहिरात काढली जाणार आहे.
.............................................

महत्वाची रिक्त पदे

पदे मंजुर कार्यरत रिक्त
चालक ३८,८२५ ३६,७३२ २,९७७

वाहक ३७,९१0 ३४,८0७ ३,९६३

कारागिर ७,६९९ ४,४६२ ३,२0२

सहा.कारागिर ६,९८५ ४,७३४ २,२१३
..................................

अधिकारी वर्ग १ आणि २ चीही ९३३ पदे मंजुर आहेत. यात प्रत्यक्षात ५५२ पदे भरलेली असून ३८१ रिक्त जागा आहेत.
..............................

एवढी मोठ्या प्रमाणात रिक्त जागा असल्याने सध्याच्या मनुष्यबळावर मोठा परिणाम होत आहे. त्यामुळे रिक्त जागा लवकरात लवकर पूर्ण करण्याचे उद्दिष्ट एसटी महामंडळाने ठेवले आहे.
..........................

रिक्त जागांसाठी भरती प्रक्रीया टप्प्याटप्यात करायची की एकदम सर्व जागा भरायचा याबाबतचा निर्णय सर्वोतोपरी एसटी महामंडळाकडून घेतला जाणार आहे. त्याआधी भरती प्रकीया राबवणाऱ्या कंपनीचीही नियुक्ती केली जाईल.
.................................