जन्मदात्रीने केली चिमुकल्याची हत्या

नोकरीसाठी बाहेरगावी राहात असलेल्या पतीसोबत आपल्याला राहता येत नाही म्हणून एका निर्दयी मातेने आपल्या दीड महिन्याच्या चिमुकल्याची

गोंदिया : नोकरीसाठी बाहेरगावी राहात असलेल्या पतीसोबत आपल्याला राहता येत नाही म्हणून एका निर्दयी मातेने आपल्या दीड महिन्याच्या चिमुकल्याची तलावात फेकून हत्या केल्याचा प्रकार गंगाझरी येथे घडला. याप्रकरणी बुधवारी पोलिसांनी त्या मातेला अटक केली.
रोशनी हितेश वैद्य (२०) असे अटक करण्यात आलेल्या मातेचे नाव असून तिचे आणि हितेश वैद्य यांचे वर्षभरापूर्वी लग्न झाले होते. ती सासरी गंगाझरी येथे तर पती खासगी नोकरीनिमित्त अमरावतीला राहात होता. पतीसोबत अमरावतीला जाण्याचा तगादा रोशनीने लावला होता. पण बाळ लहान असल्यामुळे आणखी काही दिवस गावीच थांब असे हितेशचे म्हणणे होते.
सोमवारी रात्री १०.३०च्या सुमारास रोशनीने आपले दीड महिन्याचे बाळ (वेदांत) गायब झाल्याचा कांगावा केला. शोधाशोध केल्यानंतर ११च्या सुमारास घराजवळच असलेल्या तलावाच्या पाळीत त्याचा मृतदेह आढळला. यावरून गंगाझरी पोलिसांनी भादंविच्या कलम ३०२ अन्वये गुन्हा दाखल केला होता.
गेल्या दोन दिवसात पोलिसांनी केलेल्या तपासात आई रोशनीनेच वेदांतची हत्या केल्याचे उघड झाले. वेदांतमुळे पतीसोबत अमरावतीला जाता येत नाही म्हणून तिने त्याला संपवल्याचे पोलिसांनी सांगितले. (प्रतिनिधी)