खडसेंच्या वक्तव्याने गुलाबराव पाटलांच्या दाव्याला बळ

एकनाथ खडसे यांच्यासह भाजपचे अनेक नेते आमच्या संपर्कात आहेत. किती नेते संपर्कात आहेत हे मात्र आज सांगू शकत नाही. असे विधान नुकतेच शिवसेनेचे मंत्री गुलाबराव पाटील यांनी केले होते.

मुंबई: माजी मुख्यमंत्री देवेंद्र फडणवीस आणि गिरीश महाजन यांनी माझं तिकीट कापलं, असा खळबळजनक दावा भाजपाचे ज्येष्ठ नेते आणि माजी मंत्री एकनाथ खडसेंनी केला असतानाच त्यांनी आता मोठा गौप्यस्फोट केला आहे. 'मी शिवसेनेच्या संपर्कात होतो आणि सेनेचे नेतेही माझ्या संपर्कात होते हे खरं आहे', असं वक्तव्य भाजपचे नाराज नेते एकनाथ खडसे यांनी केलं आहे.

एकनाथ खडसे यांच्यासह भाजपचे अनेक नेते आमच्या संपर्कात आहेत. किती नेते संपर्कात आहेत हे मात्र आज सांगू शकत नाही. असे विधान नुकतेच शिवसेनेचे मंत्री गुलाबराव पाटील यांनी केले होते. त्यामुळे राजकीय वर्तुळात विविध चर्चा पाहायला मिळत होती. त्यांनतर आता या विषयी खुद्द एकनाथ खडसे यांनीच खुलासा केला आहे.

एका मराठी वृत्तवाहिनीला दिलेल्या मुलाखतीत बोलताना खडसे म्हणाले की, मी भाजप सोडू शकतो किंवा जाऊ शकतो असं म्हटलं नव्हतं, मी संन्यासही घेऊ शकतो. तर पक्षाने माझ्या मागणीची नोंद घेतली याचं समाधान आहे. मला न्याय मिळेपर्यंत मी संघर्ष करणार असल्याचे खडसे म्हणाले.

तर याचवेळी पुढे बोलताना, मी शिवसेनेच्या संपर्कात होतो आणि सेनेचे नेतेही माझ्या संपर्कात होते हे खरं आहे, असेही खडसे म्हणाले. त्यामुळे एकनाथ खडसे यांच्या या वक्तव्यानंतर गुलाबराव पाटील यांच्या दाव्याला बळ मिळाला असल्याची चर्चा आहे.