नवी मुंबईतील सिडकोमध्ये १७६७ कोटींचा जमीन घोटाळा, काँग्रेसचे मुख्यमंत्र्यांसह सरकारवर गंभीर आरोप 

नवी मुंबईतील सिडकोमधील जमिनीच्या व्यवहारावरून काँग्रेसने मुख्यमंत्री देवेंद्र फडणवीस आणि राज्य सरकारवर गंभीर आरोप केले आहेत.

मुंबई - नवी मुंबईतील सिडकोमधील जमिनीच्या व्यवहारावरून काँग्रेसने मुख्यमंत्री देवेंद्र फडणवीस आणि राज्य सरकारवर गंभीर आरोप केले आहेत.  सिडकोमधील १७६७ कोटी रुपये किमतीच्या 24 एकर जमिनीची अवघ्या तीन कोटी रुपयांना व्यवहार  झाल्याचा आरोप काँग्रेसकडून करण्यात आला आहे. या घोटाळ्यामुळे मंत्रालयातील काही मंत्री आणि बड्या अधिकाऱ्यांचा सहभाग असून, हा घोटाळा झाल्याचे काँग्रेसने म्हटले आहे. 

काँग्रेसकडून आज मुंबईत पत्रकार परिषदेचे आयोजन करण्यात आले होते. या पत्रकार परिषदेत माजी मुख्यमंत्री पृथ्वीराज चव्हाण, काँग्रेस प्रवक्ते रणदीप सुरजेवाला आणि मुंबई प्रदेश काँग्रेस अध्यक्ष संजय निरुपम उपस्थित होते. यावेळी मुंबई प्रदेश काँग्रेस अध्यक्ष संजय निरुपम यांनी राज्य सरकारवर सनसनाटी आरोप केले. "कोयना प्रकल्पामुळे विस्थापित झालेले ८ शेतकरी कुटुंबांना नवी मुंबईत विमानतळाजवळ रांजणपाडा, खारघर येथे २४ एकर जमीन देण्यात आली होती. नवी मुंबई विमानतळाजवळ मोक्याच्या ठिकाणी हि २४ एकर जमीन असल्याने हिची आत्ताची किंमत सुमारे १७६७ कोटी होते. हीच जमीन या ८ शेतकरी कुटुंबांकडून पॅराडाइज बिल्डरच्या मनीष भतीजा आणि संजय भालेराव यांनी रुपये १५ लाख प्रती एकर अशा कवडीमोल भावाने दमदाटी करून विकत घेतली. म्हणजेच सुमारे १७६७ कोटीची जमीन या बिल्डरने फक्त ३ करोड ६० लाख रुपयांना जबरदस्तीने घेतली. या व्यवहारामध्ये प्रमुख मुद्दा हा आहे कि हि जमीन सिडकोच्या अखत्यारीत येत असताना देखील तहसीलदार कार्यालय, रायगड येथून हि जमीन हस्तांतरण करण्यास२६ फेब्रुवारी २०१८ रोजी मंजुरी देण्यात आलेली आहे. सरकारच्या महसूल विभाग आणि मुख्यमंत्री कार्यालय यांच्या हस्तक्षेपाशिवाय हे होऊ शकत नाही. कोयना प्रकल्पामुळे हजारो शेतकरी विस्थापित झाले मात्र याच ८ शेतकरी कुटुंबांना नवी मुंबई सारख्या चांगल्या ठिकाणी जागा कशी काय दिली जाते ? याचे कारण हे आहे कि पॅराडाइज बिल्डरने याआधीच या जागेसाठी करार केले होते. हे सगळे भाजपचे आमदार आणि मुख्यमंत्री देवेंद्र फडणवीस यांचे निकटवर्तीय असलेले प्रसाद लाड यांच्या आशीर्वादाने  झालेले आहे, असा आरोप निरुपम यांनी केला आहे. 

सिडकोमधील 24 एकर जमिनीचा व्यवहार झाला असून, कोयना प्रकल्पग्रस्तां देण्यात आलेली आणि बाजारभावाप्रमाणे सुमारे १७६७ कोटी रुपये किंमत असलेली ही जमीन अवघ्या तीन कोटी रुपयांना विकण्यात आली. या जमिनीची मनिष भतिजा आणि संजय भालेराव  यांना विक्री करण्यात आली असून, यामधील मनीष भतिजा हा भाजपा आमदार प्रसाद लाड यांचा निकटवर्तीय असल्याचा आरोप मुंबई प्रदेश काँग्रेस अध्यक्ष संजय निरुपम यांनी केला.

 ''कोयना प्रकल्पामुळे हजारो शेतकरी विस्थापित झाले परंतु फक्त याच ८ शेतकरी कुटुंबांनाच नवी मुंबईत मोक्याच्या ठिकाणी जमीन कशी देण्यात आली ? विस्थापितांना शेतीचीच जमीन देण्याचा सरकारचा नियम आहे परंतु यांना शहरातील जमीन कशी काय दिली ? नियमाप्रमाणे हे शेतकरी १० वर्षे त्यांची जमीन विकू शकत नाही मग हा व्यवहार कसा काय झाला ?'' असे सवाल माजी मुख्यमंत्री पृथ्वीराज चव्हाण यांनी उपस्थित केले.  

काँग्रेसकडून करण्यात आलेले आरोप 

- १७६७ कोटींचा भूखंड अवघ्या तीन कोटी रुपयांना व्यवहार
- सर्वे नंबर 183/CD, रांजनपाडा, खारघर येथील जमिनीचा व्यवहार
- एकाच दिवसात सर्वे, भूसंपादन आणि हस्तांतरण झाले
-सिडकोची जमीन असूनही, तहसीलदारांकडून हस्तांतरण
-  सिकडोकडून त्यावर आक्षेपही घेण्यात आला नाही
- दीड वर्ष लागणारे व्यवहार एका दिवसात पूर्ण झाले
- सिडको-नगरविकास आणि बिल्डर यांचे साटेलोटे
- मनीष भतिजा, संजय भालेराव यांच्या नावाने जमिनीची खरेदी विक्री 
- मनीष भतिजा हा पॅराडाइज बिल्डरचा मालक 
- पॅराडाइज बिल्डरवर सरकारचा वरदहस्त
- व्यवहारात प्रसाद लाड यांचाही सहभाग