पेट्रोलपंपावरची रोकड लुटली

पेट्रोलपंपावरील तरुणाला मारहाण करून ५१ हजारांची रोकड हिसकावून नेल्याची घटना कळमना-कापसीच्या पेट्रोल पंपावर शुक्रवारी पहाटेच्या वेळी घडली.

नागपूर : पेट्रोलपंपावरील तरुणाला मारहाण करून ५१ हजारांची रोकड हिसकावून नेल्याची घटना कळमना-कापसीच्या पेट्रोल पंपावर शुक्रवारी पहाटेच्या वेळी घडली. लुटारू एका मोटारसायकलवर होते.कापसी-भंडारा मार्गावर मेहता पेट्रोलपंप आहे. येथे प्रशांत रमेश गजभिये (वय २३) हा तरुण काम करतो. पहाटे ३च्या सुमारास एका मोटारसायकलवर दोन तरुण आले. त्यांनी २०० रुपयांचे पेट्रोल भरल्यानंतर प्रशांतला ५००ची नोट दिली. प्रशांतने ३०० रुपये परत करण्यासाठी जवळची पैशाची बॅग पुढे घेतली असता लुटारूंनी चाकू काढून प्रशांतला मारहाण केली आणि चाकू मारण्याचा धाक दाखवत ५१ हजारांची रोकड असलेली बॅग हिसकावून नेली.
प्रशांतने फोनवरून माहिती दिल्यानंतर पेट्रोलपंपाचे संचालक आणि कळमना पोलीस घटनास्थळी पोहोचले. पोलिसांनी या
प्रकरणी जबरी चोरीचा गुन्हा दाखल केला. आरोपींचा शोध घेतला जात आहे. (प्रतिनिधी)
>सीसीटीव्हीवरून ओळख
परिसरातील सीसीटीव्हीत आरोपी कैद झाले. मोटारसायकल आणि दोन आरोपी सीसीटीव्हीत दिसत असून, त्याआधारे पोलीस आरोपींचा छडा लावण्याचा प्रयत्न करीत आहेत.