भगवान महावीर जगातील सर्वांत मोठे पर्यावरणवादी

भगवान महावीर जगातील मोठे पर्यावरणवादी होते. पर्यावरणाचे संरक्षण करण्यासाठी ४२ वर्षे त्यांनी भारतभ्रमण केले. त्यांनी समाजाला दिलेली शिकवण प्रत्येकाने

नागपूर : भगवान महावीर जगातील मोठे पर्यावरणवादी होते. पर्यावरणाचे संरक्षण करण्यासाठी ४२ वर्षे त्यांनी भारतभ्रमण केले. त्यांनी समाजाला दिलेली शिकवण प्रत्येकाने आचरणात आणण्याची गरज आहे, असे प्रतिपादन मुख्यमंत्री देवेंद्र फडणवीस यांनी मंगळवारी येथे केले.
चिटणवीस पार्क येथे श्री जैन सेवा मंडळातर्फे भगवान महावीर जन्मकल्याणक ‘महोत्सव-२०१६’ या कार्यक्रमात मुख्यमंत्री बोलत होते. यावेळी केंद्रीय अल्पसंख्याक कल्याण मंत्री नजमा हेपतुल्ला, पालकमंत्री चंद्रशेखर बावनकुळे, लोकमत समूहाच्या एडिटोरियल बोर्डाचे चेअरमन व सकल जैन समाजाचे राष्ट्रीय अध्यक्ष खासदार विजय दर्डा, खासदार अजय संचेती, आमदार कृष्णा खोपडे, विकास कुंभारे, गिरीश व्यास, मनपा आयुक्त श्रावण हर्डीकर प्रामुख्याने उपस्थित होते.
मुख्यमंत्री म्हणाले, प्रत्येक व्यक्तीने स्वत:च्या वाणी बुद्धीवर विजय मिळविण्याची शिकवण भगवान महावीर यांनी दिली. दुसऱ्याशी संघर्ष करण्यापेक्षा स्वत:तील वाईट प्रवृत्तीवर विजय प्राप्त करण्याचा संदेश दिला. हा संदेश प्रत्येकाने आत्मसात करण्याची गरज आहे. राज्यात गोहत्या बंदी कायदा लागू करून भूतदयेचा विचार समाजात प्रस्थापित करण्याचा प्रयत्न शासनाने केला आहे. नाशिक जिल्ह्यात मांगीतुंगी महोत्सव सरकारने पुढाकार घेऊन साजरा केला. या परिसराचा तीर्थस्थळ म्हणून विकास करण्यासाठी १०० कोटी रुपयांचा निधी शासनाने दिला. महाराष्ट्रात पहिल्यांदाच अशा प्रकारे हा महोत्सव साजरा करण्यासाठी शासनाने पुढाकार घेतला आहे, असेही मुख्यमंत्र्यांनी सांगितले. प्रारंभी श्री जैन सेवा मंडळाचे अध्यक्ष मनीष मेहता यांनी प्रास्ताविकात गोवंश हत्याबंदी केल्याबद्दल राज्य शासनाचे अभिनंदन केले. ही संस्था समस्त जैन समाजाची एकमात्र प्रतिनिधी संस्था आहे. यात ८५ संस्थांचा समावेश असून ६५ हजार सदस्य असल्याचे त्यांनी सांगितले. संस्थेतर्फे अहिंसा अवॉर्ड देण्यात येत असल्याची माहिती त्यांनी दिली.
यावेळी मुनिराज प्रशमरति विजय म.सा., सुपार्श्वसागर, म.स.गुणनंदीजी यांनी उपस्थितांना शुभआशीर्वाद दिले. कार्यक्रमाचे संचालन मंत्री सतीश पेंढारी (जैन) यांनी केले. समारंभास नगरसेविका आभा पांडे, दिलीप गांधी, विजय उदापूरकर, शरद मचाले, दीपक शेंडेकर, संजय टक्कामोरे, पंकज बोहरा, डॉ. कमल पुगलिया, रवींद्र आग्रेकर, अतुल कोटेचा, रिंकू जैन, योगेन्द्र शहा, जितेंद्र तोरावत, देवेंद्र आग्रेकर, संजय नेताजी, जयप्रकाश गुप्ता आदी उपस्थित होते.