बोल की लब आझाद है तेरे...

बोल की लब आजाद हैं तेरे, बोल जबाँ अब तकतेरी है... शायर फैैज अहमद फैैज यांची कविता सादर करीत शबाना आझमी यांनी साहित्यिक, कलावंतांच्या अभिव्यक्ती स्वातंत्र्याला साद दिली.

पुणे : बोल की लब आजाद हैं तेरे, बोल जबाँ अब तकतेरी है... शायर फैैज अहमद फैैज यांची कविता सादर करीत शबाना आझमी यांनी साहित्यिक, कलावंतांच्या अभिव्यक्ती स्वातंत्र्याला साद दिली. निमित्त होते, लोकमत माध्यम समूहाच्या वतीने देण्यात येणाऱ्या मोहर ग्रुप प्रस्तुत लोकमत साहित्य पुरस्कार प्रदान सोहळ्याचे.
पुण्यातील मान्यवर साहित्यरसिकांच्या उदंड प्रतिसादात हा सोहळा रंगला. या वेळी सन्माननीय अतिथी म्हणून शबाना आझमी बोलत होत्या. या वेळी व्यासपीठावर पुण्याचे पालकमंत्री गिरीष बापट, अखिल भारतीय मराठी साहित्य संमेलनाचे अध्यक्ष प्रा. डॉ. सदानंद मोरे, नियोजित अध्यक्ष डॉ. श्रीपाल सबनीस, महाराष्ट्राच्या सांस्कृतिक कार्य विभागाचे संचालक अजय अंबेकर, मोहर ग्रुपचे अध्यक्ष व घुमानमध्ये झालेल्या अखिल भारतीय मराठी साहित्य संमेलनाचे स्वागताध्यक्ष भारत देसडला, पिंपरी चिंचवडमध्ये होणाऱ्या अखिल भारतीय मराठी साहित्य संमेलनाचे स्वागताध्यक्ष डॉ. पी. डी. पाटील, लोकमतचे संपादक विजय बाविस्कर आदी मान्यवर उपस्थित होते. 

याशिवाय अवघ्या देशाला आपल्या तालासुरांनी नाचायला लावणारे प्रख्यात संगीतकार अजय-अतुल गोगावले यांची विशेष उपस्थिती होती. कार्यक्रमाच्या अध्यक्षस्थानी लोकमत माध्यम समुहाचे अध्यक्ष विजय दर्डा होते.

लोकसंस्कृतीचे गाढे अभ्यासक, संशोधक व ज्येष्ठ विचारवंत डॉ. रा. चिं. ढेरे यांना ‘लोकमत जीवनगौरव पुरस्कारा’ने गौरवण्यात आले. प्रकृती अस्वास्थ्यामुळे ते उपस्थित राहू न शकल्याने त्यांच्या वतीने त्यांची कन्या वर्षा गजेंद्रगडकर व मुलगा मिलिंद ढेरे यांनी पुरस्कार स्वीकारला. पुरस्कार वितरण्याच्या आदल्या दिवशी लोकमत समूहाचे अध्यक्ष खासदार विजय दर्डा यांनी रा. चिं. ढेरे यांच्या घरी जाऊन त्यांची सदीच्छा भेट घेतली व त्यांना शुभेच्छा दिल्या. १ लाख रुपये, मानपत्र, सन्मानचिन्ह देऊन त्यांना सन्मानित करण्यात आले. कथा विभागात सतीश तांबे, कादंबरी विभागात नामदेव माळी, कविता विभागात श्रीधर नांदेडकर, ललित गद्य विभागात अतुल धामनकर, ललितेतर गद्य विभागात एम. डी. रामटेके, चरित्र-आत्मचरित्र विभागात अरविंद जोग, वैचारिक समीक्षा विभागात प्रा. प्रकाश पवार, अनुवाद विभागात धनश्री हळबे, विज्ञान विभागात पाणी विषय केंद्रस्थानी धरून देशोदेशीचे पाणी व इतर चार पुस्तके याबद्दल मुकुंद धाराशिवकर यांना प्रत्येकी २५ हजार, स्मृतिचिन्ह, शाल व श्रीफळ देऊन सन्मानित करण्यात आले. सर्वोत्कृष्ट मुखपृष्ठासाठी चित्रकार सतीश भावसार यांना ११ हजार रुपये, स्मृतीचिन्ह, शाल, श्रीफळ देऊन गौरवण्यात आले.

-------------

देवळासारखं घर

डॉ. रा. चिं. ढेरे यांच्या घरी त्यांच्या आशीर्वाद घेण्यास गेलो तो दिवस माझ्या दृष्टीने अत्यंत महत्त्वाचा होता. घरातलं वातावरण पाहिल्यानंतर मला एखाद्या देवळात गेल्यासारखे वाटले. अण्णांच्या जवळ मी त्यांच्या सौभाग्यवतींना बसवलं व त्यांचा हात अण्णांच्या हातावर ठेवला. त्यावेळी त्यांच्या चेहऱ्यावर जे स्मित उमललं ती माझ्यासाठी सुंदर आठवण ठरली आहे, असे खासदार विजय दर्डा यांनी यावेळी सांगितले.

हा सर्जनाचा, विचारांचा उत्सव - विजय दर्डा
खासदार विजय दर्डा म्हणाले, लोकमत साहित्य पुरस्कार हा सर्जनाचा, विचारांचा उत्सव आहे. विविध क्षेत्रांत जे जे उत्तम आहे ते ते वाढावे अशी लोकमतची भूमिका आहे. त्या पार्श्वभूमीवर हे लोकमतचे पुरस्कार वितरणाचे तिसरे पर्व आहे. पुरस्कार वापसीच्या दिवसांत हे लोकमतचे पुरस्कार दिले जात आहेत. परंतु पारदर्शक पद्धतीने हे पुरस्कार दिले जात असल्याने ते कुणीही परत करणार नाही. या साहित्य पुरस्कारांच्या माध्यमातून मराठीला नवी दिशा मिळेल असा विश्वास मला वाटतो.