'सजग रहो..' महाराष्ट्राच्या रणांगणात घरोघरी प्रचार; RSS ची रणनीती, महायुतीला फायदा

एकीकडे मुस्लीम समाजाकडून महाविकास आघाडीला मतदान करण्यासाठी प्रयत्न केले जात असताना दुसरीकडे महायुतीच्या प्रचारासाठी हिंदू विचारधारी संघटना एकवटल्या आहेत. 

मुंबई - महाराष्ट्र विधानसभा निवडणुकीच्या मतदानाला काहीच दिवस शिल्लक आहेत. त्यात मतदारांना आकर्षिक करण्यासाठी राजकीय पक्षांकडून आश्वासनांचा पाऊस पाडला आहे. एका विशिष्ट समाजाच्या मतदानासाठी फतवा काढला जात असल्याचा आरोप विरोधकांकडून केला जात आहे तर दुसरीकडे घरोघरी पोहचून प्रचार केला जातोय. मतांचे धुव्रीकरण करण्याचा नेत्यांचा प्रयत्न आहे. मुस्लिम संघटना आणि मौलवींकडून महाविकास आघाडीला मतदान करण्यासाठी प्रयत्न होत आहे. त्यावर व्होट जिहादचा आरोप महायुतीकडून केला जात आहे. त्यानंतर आता हिंदू मतांना एकजूट करण्यासाठी संघ परिवारही मैदानात उतरला आहे.

निवडणुकीच्या सुरुवातीपासून संघ परिवाराकडून महाराष्ट्रातील सलग्न संघटना आणि प्रचारकांच्या छोट्या छोट्या बैठका सातत्याने घेतल्या जात आहेत. आता या बैठकांना आणखी वेग आला आहे. घरोघरी जात हिंदू मतदारांना एकत्र करण्याचा प्रयत्न केला जात आहे. यात आरएसएसनं सजग रहो हे अभियान सुरू केले आहे. त्यात संघाचे ३३ प्रचारक आणि संघ विचारसरणीच्या जवळपास १०० संघटनांना ग्राऊंडवर उतरल्या आहेत. 'सजग रहो' मोहिमेत सहभागी झालेल्या संस्थांचे नेतृत्व चाणक्य प्रतिष्ठान, मातंग साहित्य परिषद, रणरागिणी आणि सेवाभावी संस्था करत आहेत. या सर्व संघटना महाराष्ट्रातील चार प्रादेशिक विभागात (कोकण, उत्तर महाराष्ट्र, पश्चिम महाराष्ट्र आणि विदर्भ) सक्रिय आहेत. 

महाराष्ट्रात मराठी मुस्लिम सेवा संघाच्या नेतृत्वाखाली १८० हून अधिक स्वयंसेवी संस्था मुस्लीम मतदारांना एकत्र करण्यासाठी रात्रंदिवस काम करत असल्याची माहिती RSS ला मिळाली आहे. या संस्था मुस्लीम मतदारांची नावे यादीत टाकण्यापासून मतदानापर्यंत सर्व काम करणार आहेत. या संघटनांच्या सक्रियतेमुळे २०२४ मध्ये मुस्लिम मतदारांची मतदानाची टक्केवारी १५% वाढली आहे. त्यामुळे आधीच कार्यरत असलेल्या संघाने आपली ताकद दुप्पट करून हिंदू मतदारांना एकत्र करण्यासाठी अहोरात्र काम सुरू केले आहे. यातच भाजपाच्या सर्व ज्येष्ठ नेत्यांनी आपल्या वक्तव्यातून हिंदू समाजाला इशारा देऊन मतांचे ध्रुवीकरण सुरू केले आहे. आरएसएसची 'सजग रहो' ही मोहीम त्याचाच एक भाग आहे. यामध्ये पंतप्रधान मोदींचा ' एक है तो सेफ है' आणि योगींच्या 'एक है तो नेक है' या घोषणा देण्यात आल्या आहेत.

दरम्यान, बांगलादेशी घुसखोरी आणि रोहिंग्या मुस्लिमांच्या प्रभावाबाबतही ‘सजग रहो’ मोहिमेद्वारे लोकांना सावध केले जात आहे. याशिवाय, विहिंप आणि बजरंग दल या आरएसएसच्या सहकारी संघटना महाराष्ट्रातील सर्व २८८ विधानसभा मतदारसंघात घरोघरी जाऊन प्रचार करत आहेत. जातिभेदापासून दूर राहून हिंदू म्हणून मतदानात सहभागी होण्याचे आवाहनही ते करत आहेत. यंदाच्या विधानसभा निवडणुकीत संघ आणि भाजपाच्या स्थानिक नेत्यांमध्ये परस्पर समन्वय ठेऊन समाजाच्या सर्व घटकांपर्यंत पोहोचण्याच्या प्रयत्नात आरएसएस आणि त्याच्या विविध घटकांनी आतापर्यंत अनेक बैठका घेतल्या आहेत.