केंद्रीय गृहमंत्री अमित शाहांच्या प्रचार सभांचा धडाका; 'या' दिवशी पहिली सभा कोल्हापुरात

Maharashtra Assembly Election 2024 : लोकसभेलाही त्यांनी संजय मंडलिक यांच्या प्रचारासाठी कोल्हापूरमध्ये जाहीर सभा घेतली होती. यानंतर त्यांनी ऑक्टोबरमध्ये येथील महासैनिक दरबार हॉलवर पश्चिम महाराष्ट्रातील पाच जिल्ह्यातील पदाधिकाऱ्यांचा मेळावा घेतला होता.  

Maharashtra Assembly Election 2024 : कोल्हापूर : आागामी विधानसभा निवडणुकीसाठी सर्व राजकीय पक्ष जोरदार तयारीला लागले आहेत. या पार्श्वभूमीवर भाजप नेते, केंद्रीय गृहमंत्री अमित शाह हे शुक्रवार ८ नोव्हेंबरला कोल्हापूर दौऱ्यावर येत असून, त्यांची सकाळी ११ वाजता जाहीर सभा होणार आहे. 

महायुतीची राज्यातील पहिली जाहीर सभा काल (दि.५) कोल्हापूर उत्तर मतदारसंघात झाली. त्यामुळे आता अमित शाह यांची सभा कोल्हापूर दक्षिणमध्ये भाजपचे उमेदवार अमल महाडिक यांच्या मतदारसंघात ही सभा घेण्यात येणार आहे. या सभेची जागा अजून निश्चित झालेली नाही. 

कोल्हापूरचे जावई असलेल्या अमित शहा यांचे कोल्हापूरकडे विशेष लक्ष असते. लोकसभेलाही त्यांनी संजय मंडलिक यांच्या प्रचारासाठी कोल्हापूरमध्ये जाहीर सभा घेतली होती. यानंतर त्यांनी ऑक्टोबरमध्ये येथील महासैनिक दरबार हॉलवर पश्चिम महाराष्ट्रातील पाच जिल्ह्यातील पदाधिकाऱ्यांचा मेळावा घेतला होता.  आता राज्यातील विधानसभा निवडणुकीच्या पार्श्वभूमीवर अमित शाह यांच्या सभांचा धडाका पाहायला मिळणार आहे.

अमित शाह यांची कोल्हापुरात पहिली सभा होणार आहे. कोल्हापूर दक्षिण मतदारसंघात अमल महाडिक आणि काँग्रेसचे आमदार ऋतुराज पाटील यांच्यात लढत असल्याने भाजपने ही जागा प्रतिष्ठेची केली आहे. कोल्हापूर दक्षिण येथील सभेनंतर अमित शाह यांची सांगली - जत, सातारा -कराड दक्षिण आणि पुणे येथील पर्वती मतदारसंघात सभा होणार असल्याचे म्हटले जात आहे.