अर्ज माघारीच्या आधीच अपक्ष उमेदवाराचे सहकुटुंब अपहरण? उमेदवार म्हणतोय नाही नाही...

छत्रपती संभाजीनगरमधून ठाकरे गटाचे राजू शिंदे हे उभे आहेत. तर त्यांच्याच नावाशी साधर्म्य असलेल्या उमेदवारानेही अर्ज दाखल केला आहे.

उमेदवारी अर्ज माघारी घेण्यासाठी उद्याचा दिवस आहे. यामुळे एकाच नावाचे, अपक्ष उमेदवार माघार कशी घेतील याची बेगमी करण्यात पार दिल्लीपासून ते गल्लीपर्यंत प्रयत्न सुरु आहेत. अशातच एका अपक्ष उमेदवाराचे त्याची पत्नी, बहीण, मेहुण्यासह अपहरण झाल्याची तक्रार संगमनेर पोलीस ठाण्यात करण्यात आली आहे. 

छत्रपती संभाजीनगरमधून ठाकरे गटाचे राजू शिंदे हे उभे आहेत. तर त्यांच्याच नावाशी साधर्म्य असलेल्या उमेदवारानेही अर्ज दाखल केला आहे. या अपक्ष उमेदवाराचे अपहरण करण्यात आल्याची तक्रार त्याच्या सहकाऱ्याने केली आहे. शिर्डीहून नाशिकला जात असताना हे अपहरण झाल्याचे यात म्हटले आहे. गुन्हा दाखल झाला असून झिरो नंबरने गुन्हा शिर्डी पोलीस ठाण्यात वर्ग केला जाणार आहे. संगमनेर शहराजवळील समनापूर गावाजवळ हे अपहरण झाल्याचे सांगितले जात आहे. 

अशातच अपक्ष उमेदवाराने ही अफवा असल्याचे म्हटले आहे. राजू शिंदे यांनी आपण आपला उमेदवारी अर्ज मागे घेण्यासाठी जात असल्याचे म्हटले आहे. तर त्यांचे सहकारी मंगेश जाधव यांच्या तक्रारीवरून हा गुन्हा नोंदविण्यात आला आहे.