Maharashtra Government: शिवसेनेकडून संजय राऊतांचा वापर: नारायण राणे

शिवसेनेची दिशाभूल करून त्यांना बरबाद करण्याचे काम राऊत हे करत असल्याचे सुद्धा राणे म्हणाले.

मुंबई : भाजपानं शरद पवारांचे पुतणे असलेल्या अजित पवारांना गळाला लावून भाजपा-राष्ट्रवादीचं सरकार स्थापन केलं, त्यामुळे राज्याच्या राजकारणाला वेगळीच दिशा मिळाली. मात्र त्यांनतर भाजप -शिवसेना नेत्यांमधील वाद अधिकच वाढला असून, एकमेकांवर आरोप-प्रत्यारोप केले जात आहे. तर संजय राऊतांचा शिवसनेने आजपर्यंत फक्त वापर करून घेतला असल्याचा खोचक टोला नारायणे राणेंनी राऊत यांना लगावला आहे.

महाविकासआघाडीला राज्यपालांनी बोलवले होते. मग त्यांनी आपले बहुमत सिद्ध का केले नाहीत. आता आम्ही सरकार स्थापन केले असून 30 तारखेला बहुमत सुद्धा सिद्ध करू, असे राणे म्हणाले. तसेच काँग्रेस-राष्ट्रवादी व शिवसेना आमच्याकडे बहुमतापेक्षा जास्त आमदार असल्याचे दावा करत आहे. मात्र त्यांना त्यांच्या आमदारांवर विश्वास नाही. त्यामुळे आतापर्यंत पाच वेळा आमदारांचे ठिकाण बदलण्यात आले असल्याचा आरोप राणे यांनी केला.

पुढे बोलताना त्यांनी शिवसेना नेते संजय राऊत यांच्यावर सुद्धा निशाणा साधला. संजय राऊत यांचे माझ्यासमोर नाव घेत जाऊ नका. संजय राऊत हे कोण आहेत. एक महिन्यापासून ते बडबड करत असताना सुद्धा काहीच झालंं नाही. त्यांना कुणीच विचारत नसल्याचे राणे म्हणाले. तर शिवसनेचे लोकं राऊत यांचे वापर करत आहे. तसेच शिवसेनेची दिशाभूल करून त्यांना बरबाद करण्याचे काम राऊत हे करत असल्याचे सुद्धा राणे म्हणाले.

तर गेल्या चाळीस वर्षापासून मी महाराष्ट्राच्या राजकरणात सक्रीय असून, सर्वच पक्षातील आमदार माझ्या संपर्कात आहे. माझी सर्वांशी चांगली ओळख असून आमचे मैत्रीचे संबंध असल्याचे राणे म्हणाले. शिवसेनेत मी 39 वर्षे काढली आहे, त्यामुळे सेनेचे सर्वच आमदार माझ्या ओळखीचे असल्याचे ते म्हणाले. तसेच मी भाजपमध्ये असल्याने माझी जवाबदारी आहे की, आमच्या पक्षाचे सरकार स्थापन करावे. त्यामुळे त्यासाठी मी प्रयत्न करणार असल्याचे राणे म्हणाले.