'अजून एका सातारकराची मुख्यमंत्रीपदी वर्णी', शरद पवारांच्या एकनाथ शिंदेंना खास शुभेच्छा...

Maharashtra Political Crisis: गेल्या काही दिवसांपासून सुरू असलेल्या सत्तासंघर्षाचा आज शेवट झाला. भाजप नेते देवेंद्र फडणवीस यांनी धक्कातंत्राचा वापर करत एकनाथ शिंदे यांना मुख्यमंत्री करण्याची घोषणा केली आहे.

Eknath Shinde: गेल्या काही दिवसांपासून सुरू असलेल्या सत्तासंघर्षाचा आज शेवट झाला. राज्याच्या राजकारणात एक नवा ट्विस्ट पाहायला मिळाला. भाजप नेते देवेंद्र फडणवीस यांनी धक्कातंत्राचा वापर करत एकनाथ शिंदे यांना मुख्यमंत्री करण्याची घोषणा केली. त्यांच्या या घोषणामुळे अनेकांना धक्का बसला आहे. दरम्यान, राष्ट्रवादीचे सर्वेसर्वा शरद पवार यांनी एकनाथ शिंदेंना शुभेच्छा दिल्या आहेत.

स्व. यशवंतराव चव्हाण, श्री. बाबासाहेब भोसले, श्री. पृथ्वीराज चव्हाण यांच्यानंतर अजून एका सातारकरांची मुख्यमंत्रीपदी वर्णी लागली याचा आनंद आहे.

— Sharad Pawar (@PawarSpeaks) June 30, 2022

शरद पवार यांनी एकनाथ शिंदे यांना ट्विटद्वारे शुभेच्छा दिल्या. ''एकनाथ शिंदे यांची महाराष्ट्र राज्याचे नवे मुख्यमंत्री म्हणून निवड झाल्याबद्दल मनपूर्वक अभिनंदन! महाराष्ट्राच्या हिताची जपणूक त्यांच्याकडून होईल अशी सार्थ अपेक्षा व्यक्त करतो. स्व. यशवंतराव चव्हाण, बाबासाहेब भोसले, पृथ्वीराज चव्हाण यांच्यानंतर अजून एका सातारकरांची मुख्यमंत्रीपदी वर्णी लागली याचा आनंद आहे,'' असे शरद पवार म्हणाले.

श्री. एकनाथरावजी शिंदे यांचे माझ्या व राष्ट्रवादी काँग्रेस पक्षाच्या वतीने मनःपूर्वक अभिनंदन ! महाराष्ट्र हे एक अत्यंत प्रगतिशील राज्य आहे, मुख्यमंत्री म्हणून श्री. एकनाथरावजी यांनी राज्याला अजून नव्या उंचीवर न्यावे, अशा शुभेच्छा मी त्यांना देतो. @mieknathshinde

— Jayant Patil- जयंत पाटील (@Jayant_R_Patil) June 30, 2022

जयंत पाटलांच्या शुभेच्छा

राष्ट्रवादीचे प्रदेशाध्यक्ष जयंत पाटील यांनीदेखील एकनाथ शिंदे यांना शुभेच्य़ा दिल्या. ''एकनाथरावजी शिंदे यांचे माझ्या व राष्ट्रवादी काँग्रेस पक्षाच्या वतीने मनःपूर्वक अभिनंदन ! महाराष्ट्र हे एक अत्यंत प्रगतिशील राज्य आहे, मुख्यमंत्री म्हणून एकनाथरावजी यांनी राज्याला अजून नव्या उंचीवर न्यावे, अशा शुभेच्छा मी त्यांना देतो,'' असे जयंत पाटील म्हणाले. जितेंद्र आव्हाड यांनीही शिंदेंना शुभेच्छा दिल्या.

मा.एकनाथ शिंदे महाराष्ट्राचे मुख्यमंत्री झाले
अनेक वर्ष एकत्र काम केले म्हणून मला आनंद आहे ... ......
खूप खूप शुभेच्छा@mieknathshinde

— Dr.Jitendra Awhad (@Awhadspeaks) June 30, 2022

सायंकाळी नवीन मुख्यमंत्र्यांचा शपथविधी
गेल्या काही दिवसांपासून राज्यात सुरू असलेला सत्तासंघर्ष आज संपला. देवेंद्र फडणवीस यांनी एकनाथ शिंदे यांना मुख्यमंत्री करण्याची घोषणा केली. तसेच, भाजप शिवसेनेच्या सरकारला पाठिंबा देईल आणि अपक्षांसह भाजपचे लोकही सत्तेत सहभागी होतील, असे फडणवीस म्हणाले. विशेष म्हणजे, स्वतः फडणवीस सत्तेत मंत्रिमंडळात नसतील. दरम्यान, आता सायंकाळी 7.30 वाजता एकनाथ शिंदे यांचा शपथविधी होणार आहे. या शपथविधीकडे सर्वांच्या नजरा लागल्या आहेत.