विधान भवनाच्या पायऱ्यांवर नेमकं काय घडलं?; आमदार महेश शिंदेंनी मांडली बाजू

लोकशाहीचे संकेत विरोधकांनी पाळले नाही. सीसीटीव्ही फुटेज पाहावेत अशी मागणी आमदार महेश शिंदे यांनी केली आहे.

मुंबई - विधिमंडळाच्या पावसाळी अधिवेशनात आज मोठा गदारोळ झाल्याचं पाहायला मिळालं. एरव्ही विरोधी पक्षाचे आमदार ५० खोके एकदम ओक्के हा नारा देत विधानभवनाच्या पायऱ्यांवर आंदोलन करताना दिसले. परंतु आज सत्ताधारी पक्षाचे आमदारही राष्ट्रवादी-शिवसेनेविरोधात नारेबाजी करत होते. अधिवेशनापूर्वी शिंदे गटाचे आमदार पायऱ्यांवर घोषणाबाजी करत असताना विरोधकही तेथे उपस्थित झाले. त्यानंतर विरोधक आणि सत्ताधारी यांच्यात राडा झाला. 

या गोंधळात शिंदे गटाचे आमदार महेश शिंदे आणि राष्ट्रवादीचे विधान परिषदेचे आमदार अमोल मिटकरी हे एकमेकांच्या अंगावर धावून गेले. मात्र इतर आमदारांनी मध्यस्थी करत वातावरण शांत करण्याचा प्रयत्न केला. या संपूर्ण प्रकारावर आमदार महेश शिंदे म्हणाले की, मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांच्या नेतृत्वात सरकार अतिशय चांगले काम करतंय. परंतु गेल्या ६ दिवसांपासून विरोधी पक्षाचे आमदार आंदोलन करताना वेगवेगळे आरोप करत होते. त्याला उत्तर देण्यासाठी आमचे प्रतोद भरत गोगावले यांच्या नेतृत्वात आमदारांची बैठक झाली. या बैठकीत विरोधकांच्या निषेधार्थ आंदोलन करायचं ठरलं असं त्यांनी सांगितले. 

तसेच सकाळपासून आम्ही शांततेत हे आंदोलन विधानभवनाच्या पायऱ्यांवर करत होतो. त्यानंतर राष्ट्रवादीचे आमदार आमच्या मागे उभे राहिले आणि अचानक काही आमदार आमच्या पुढे येऊन आंदोलन करू लागले. जे काही आहे ते कॅमेऱ्यात रेकॉर्ड झालंय. विरोधक ज्यापद्धतीने वागले ते महाराष्ट्रानं पाहिलं आहे. आम्ही आंदोलन करताना त्याठिकाणी येणे चुकीचं होतं असं आमदार महेश शिंदे यांनी म्हटलं. 

दरम्यान, लोकशाहीचे संकेत विरोधकांनी पाळले नाही. सीसीटीव्ही फुटेज पाहावेत आमचं आंदोलन कशारितीने दाबण्याचा प्रयत्न केला हे पाहिलं पाहिजे. याबाबत विधानसभा अध्यक्षांकडे आम्ही तक्रार केली आहे. अमोल मिटकरी चुकीच्या विचारांचे व्यक्तिमत्व आहेत हे महाराष्ट्रानं पाहिलंय. त्यामुळे त्यांना फार किंमत देत नाही. बाळासाहेबांचे विचार आम्ही पुढे जाण्यासाठी शिंदेंच्या नेतृत्वात आम्ही बाहेर पडलो. गेले अडीच वर्ष मविआ सरकारचा भोंगळ कारभार सुरू होता. मागच्या सरकारमध्ये जे होते त्यांनी महाराष्ट्राशी गद्दारी केली असा आरोप आमदार महेश शिंदे यांनी लगावला.