मनोज म्हात्रे हत्येप्रकरणी चुलत भावाविरोधात गुन्हा

काँग्रेसचे नगरसेवक मनोज म्हात्रे यांच्या हत्येप्रकरणी त्यांचा चुलत भाऊ प्रशांत म्हात्रेविरोधात गुन्हा दाखल करण्यात आला आहे.

ऑनलाइन लोकमत

भिवंडी, दि. 15 - काँग्रेसचे नगरसेवक मनोज म्हात्रे यांच्या हत्येप्रकरणी त्यांचा चुलत भाऊ प्रशांत म्हात्रेसहीत 7 जणांविरोधात गुन्हा दाखल करण्यात आला आहे. राजकीय वैमनस्यातून हत्या झाल्याचे फिर्यादीमध्ये नमूद करण्यात आले आहे. नारपोली पोलिसांनी ही कारवाई केली आहे. आरोपींना लवकरच अटक करणार, अशी ग्वाही पोलीस उपायुक्ती मनोज पाटील यांनी दिली आहे. 

 

भिवंडीत महानगरपालिकेतील नगरसेवक व काँग्रेसचे गटनेते मनोज म्हात्रे (५३) यांची मंगळवारी रात्री गोळ्या घालून निर्घृण हत्या करण्यात आली. रात्री साडेनऊच्या सुमारास येथील ओसवालवाडीमागे, कामतघर येथे त्यांच्यावर चार अज्ञातांनी हल्ला केला.

 

रामनगर येथील समर्थक उमाशंकर ऊर्फ मुलायम यादव यांना विरोधकांनी धमकावल्याने त्यांच्यावर पोलिसांनी कारवाई करावी यासाठी मनोज म्हात्रे नारपोली पोलीस ठाण्यात गेले होते. तेथून ते ओसवालवाडी येथील राहत्या घरी आले असता दबा धरून बसलेल्या सात ते आठ जणांच्या टोळक्याने कोयत्याने हातावर केले व त्यांच्या छातीवर तीन गोळ्या झाडल्या. 

 

यातील दोन गोळ्या वर्मी लागल्याने ते जागीच कोसळले. त्यांना तातडीने ठाण्याच्या खासगी हॉस्पिटलमध्ये नेण्यात आले. मात्र उपचारापूर्वीच त्यांचा मृत्यू झाल्याचे डॉक्टरांनी घोषित केले.  मनोज म्हात्रे हे 2002 पासून नगरसेवक असून त्यांनी दोनवेळा स्थायी समितीचे सभापतीपद भूषवले आहे. ज्येष्ठ नेते नारायण राणे यांचे निकटवर्ती म्हणून ते ओळखले जात.