"तू खरा पाटील असेल तर..."; मंत्री छगन भुजबळांचं मनोज जरांगे पाटील यांना आव्हान

ओबीसी आरक्षणाचा निर्माता मंडल आहे. तुला थोडीतरी अक्कल पाहिजे अशी भावना छगन भुजबळांनी व्यक्त केली.

मुंबई - Chhagan Bhujbal on Manoj Jarange Patil ( Marathi News ) मराठा आरक्षणाच्या ओबीसी समावेशाला मंत्री छगन भुजबळ सातत्याने विरोध करत आहेत. त्यामुळे मनोज जरांगे पाटील हे मी मंडल आयोगाला चॅलेंज करेन असा इशारा देत आहेत. त्यावर तुझी हिंमत असेल आणि जरांगे तू खरा पाटील असशील तर मंडल आयोगाला आव्हान दे, मंडल आयोग संपवून दाखव असा प्रतिइशाराच भुजबळांनी दिला आहे. 

छगन भुजबळ म्हणाले की, मराठा समाजाला वेगळे आरक्षण द्या हे आमचे म्हणणं आहे. सुक्रे आयोगाच्या माध्यामातून ते काम होतंय. त्याला कायद्याचे स्वरुप देण्याचे काम कदाचित विशेष अधिवेशन घेऊन करण्यात येईल अशी माहिती आहे. सरकारने ते करावे. आमचा पाठिंबा आहे. परंतु जे खोटे कुणबी दाखवून ओबीसीत घुसवले आहेत त्यांना ओबीसीऐवजी वेगळ्या आरक्षणात टाकावे असं त्यांनी सांगितले. 

तसेच जरांगे पाटील स्वत: ला काय समजतो, प्रत्येकवेळी अल्टिमेटम देतो. इथं लोकशाही आहे की हुकुमशाही चालली आहे?. मी राजीनामा दिलाय की नाही याबाबत जरांगेंना म्हणाव, तुम्ही ज्या मुख्यमंत्री एकनाथ शिंदेंचे ऐका त्यांना विचारा असा टोला भुजबळांनी लगावला. त्याचसोबत नाभिक समाजातील संघटनांनी पत्रक काढून स्पष्ट केले आहे. मी भाषणात कुठल्याही प्रकारे नाभिक समाजाने मराठा समाजावार बहिष्कार टाकावा असं म्हटलो नाही. ते एका गावापुरते मर्यादित होते. पण एक दोन खोडसाळ लोकांनी ध चा मा करून वेगळं वातावरण तयार केले असं भुजबळांनी स्पष्ट सांगितले. 

दरम्यान, ओबीसीतून आरक्षण पाहिजे आणि ओबीसी आरक्षणाचा निर्माता मंडल आहे. तुला थोडीतरी अक्कल पाहिजे. तु ते खल्लास करणार म्हणून सांगतो आणि ओबीसीत आरक्षण घेणार बोलतो. एवढीही अक्कल नाही अशी संतप्त भावना छगन भुजबळांनी व्यक्त केली.