मांस घेऊन जाणारा ट्रक पेटवला

नगर-मनमाड रस्त्यावरून कोपरगावकडे मांस घेऊन जाणारा मालट्रक राहाता येथे तरुणांनी अडवून पेटवून दिला. संतप्त जमावाने गाडीवर दगडफेक केली.

राहाता (जि. अहमदनगर) : नगर-मनमाड रस्त्यावरून कोपरगावकडे मांस घेऊन जाणारा मालट्रक राहाता येथे तरुणांनी अडवून पेटवून दिला. संतप्त जमावाने गाडीवर दगडफेक केली. अर्ध्या तासाने आलेल्या पोलिसांनी जमावाला पांगवले.
रविवारी दुपारी नगर-मनमाड महामार्गावरून एक ट्रक कोपरगावकडे जात असताना राहाता येथे ट्रकमध्ये मांस असल्याचे काही तरुणांच्या लक्षात आले. त्यामुळे संतप्त झालेल्या तरुणांनी ट्रक अडवून चालकाला याबाबत जाब विचारला. हळूहळू लोकांची गर्दी होऊ लागली. जमावाला पाहताच चालक व क्लीनर पळून गेले. त्यातच काही तरुणांनी गाडीला आग लावली. बघता बघता चारशे-पाचशे लोकांचा जमाव जमा झाला.
माहिती मिळताच पोलिसांनी घटनास्थळाकडे धाव घेतली. पोलिसांनी जमावाला पांगविण्याचा प्रयत्न केला. त्याचदरम्यान शिर्डी व राहाता नगर परिषदेच्या अग्निशमन गाड्यांना पाचारण करण्यात आले. संतप्त जमावाने या गाड्यांवरच दगडफेक केल्याने त्यांना आग विझवण्यास काही काळ व्यत्यय आला.
पोलिसांनी हस्तक्षेप करून जमाव पांगविल्यानंतर अग्निशामक दलाच्या कर्मचाऱ्यांनी गाडी विझवली. राहाता पोलीस ठाण्यात गुन्हा दाखल करण्याचे काम रात्री उशिरापर्यंत सुरू होते. (वार्ताहर)