महाडच्या नगराध्यक्षपदी महम्मद पल्लवकर विजयी

काँग्रेस पक्षाचे निर्विवाद वर्चस्व असलेल्या महाड नगर परिषदेच्या नगराध्यक्षपदी काँग्रेसचे महम्मद अली पल्लवकर हे ११ विरुद्ध ६ अशा मतांनी विजयी झाले.

महाड : काँग्रेस पक्षाचे निर्विवाद वर्चस्व असलेल्या महाड नगर परिषदेच्या नगराध्यक्षपदी काँग्रेसचे महम्मद अली पल्लवकर हे ११ विरुद्ध ६ अशा मतांनी विजयी झाले. तहसीलदार संदीप कदम यांच्या अध्यक्षतेखाली नगराध्यक्ष निवडीसाठी मंगळवारी विशेष सभेचे आयोजन करण्यात आलेले होते. पल्लवकर यांनी शिवसेनेचे शहरप्रमुख दीपक सावंत यांचा पराभव केला.
नगराध्यक्षपदी पल्लवकर यांची निवड घोषित होताच काँग्रेस कार्यकर्त्यांनी फटाक्याची आतषबाजी करून आनंदोत्सव साजरा केला. यावेळी माजी आ. माणिक जगताप तालुका काँग्रेसचे अध्यक्ष कृष्णा शिंदे, उपनगराध्यक्ष संदेश कलमकर आदी काँग्रेसचे पदाधिकारी उपस्थित होते.
यावेळी नवनिर्वाचित नगराध्यक्ष महम्मद पल्लवकर यांची शहरातून भव्य मिरवणूकही काढण्यात आली. पल्लवकर यांच्या निवडीचे शहरात सर्वत्र स्वागत करण्यात येत आहे.