मुलीची गळा दाबून हत्या करुन आईची आत्महत्या

पिंपरी, दि. 23 - पोटच्या मुलीचा गळा आवळून खून केल्यानंतर आईने पंख्याला दोरी बांधून गळफास घेवून आत्महत्या केली. ही धक्कादायक घटना शनिवारी दुपारी एकच्या सुमारास कासारवाडीत उघडकीस आली. घटनास्थळी चिठ्ठी आढळून आली असून नैराश्येपाटी आत्महत्या केली असल्याचे त्यात नमूद केले आहे.  

 

पोलिसांनी दिलेल्या माहितीनुसार, नीलम सचिन भामे (वय २६) असे आत्महत्या केलेल्या महिलेचे नाव आहे. तर गळा आवळून खून केला त्या सहा वर्षाच्या चिमुरडीचे नाव लावण्या असे आहे. पोटच्या मुलीचा गळा दाबून खून केल्यानंतर मातेने स्वत: गळफास घेऊन आत्महत्या केल्याच्या कासारवाडीतील घटनेने शहरात खळबळ उडाली. 

 

महिलेचे पती मिलन भामे खासगी कंपनीत कामाला आहेत. ते सकाळी कामाला गेले होते. तर सासू-सासरे रुग्णालयात गेले होते. घरात कोणीही नाही. याची खात्री झाल्यानंतर नीलम यांनी खेळण्यांबरोबर खेळत असलेल्या मुलगी लावण्या हिचा गळा आवळून खून केला. एक चिठ्ठी लिहून ठेवली. त्यानंतर घरातील पंख्याला दोरीच्या साह्याने गळफास घेऊन स्वत:ची जीवनयात्रा संपवली. भोसरी पोलीस घटनास्थळी दाखल झाले, त्यांना नीलम यांनी लिहिलेली चिठ्ठी आढळून आली. या चिठ्ठीत ‘‘माझ्या आत्महत्येसाठी कोणाला जबाबदार धरू नये. मला एकाकी वाटायचे, पती समजून सांगायचे, मी समजून घेतले नाही. माझ्यानंतर मुलीचे काय? असा प्रश्न पडला, त्यामुळे स्वत:बरोबर मुलीचे जीवन संपविण्याचा निर्णय घेतला. असे त्या चिठ्ठीत नमूद केले आहे.