नायब तहसीलदारांवर हल्ला

वाळू तस्करांनी महसूल भरारी पथकाच्या निवासी नायब तहसीलदारासह तलाठ्यावर जीवघेणा हल्ला केल्याचा प्रकार चिखली येथे आढळा नदीपात्रात घडला

संगमनेर (अहमदनगर) : वाळू तस्करांनी महसूल भरारी पथकाच्या निवासी नायब तहसीलदारासह तलाठ्यावर जीवघेणा हल्ला केल्याचा प्रकार चिखली येथे आढळा नदीपात्रात घडला.
शहर पोलिसांनी तिघांविरुद्ध गुन्हा दाखल केला आहे. शनिवारी रात्री चिखली शिवारातील आढळा नदीपात्रातून अवैधरित्या विनापरवाना वाळूचा उपसा केला जात असल्याची गुप्त माहिती महसूलच्या भरारी पथकाचे प्रमुख निवासी नायब तहसीलदार दत्तात्रय जाधव यांना मिळाली. त्यांनी दीड वाजेच्या सुमारास तलाठी पोमल तोरणे यांच्यासह नदीपात्रात छापा टाकला. छाप्यात वाळुने भरलेला ट्रॅक्टर पकडला. मात्र वाळू तस्कर आयुब हसन शेख व लतीफ हसन शेख यांनी टॅक्टर तहसील कार्यालयात नेण्यास नकार दिला. दोघांनी तोरणे व जाधव यांना शिवीगाळ, दमदाटी करून लाथाबुक्क्यांनी मारहाण केली. जाधव यांच्याकडील मोबाइल हिसकावून ट्रॅक्टर घेऊन दोघे फरार झाले.