नक्षल्यांकडून युवकाचे अपहरण करून गोळ्या झाडून हत्या

गट्टा पोलीस मदत केंद्रांतर्गत येणाऱ्या जांभिया या गावातील एका युवकाची शुक्रवारी रात्री नक्षल्यांनी गोळ्या झाडून हत्या केली. नक्षलवाद्यांनी २ मार्च रोजी या युवकाचे अपहरण केले होते.

एटापल्ली : गट्टा पोलीस मदत केंद्रांतर्गत येणाऱ्या जांभिया या गावातील एका युवकाची शुक्रवारी रात्री नक्षल्यांनी गोळ्या झाडून हत्या केली. नक्षलवाद्यांनी २ मार्च रोजी या युवकाचे अपहरण केले होते.
मनोज बैसू गोटा (२०) असे या युवकाचे नाव असून २ मार्च रोजी त्याचे अपहरण केले तेव्हा घरात त्याची पत्नी व तीन महिन्यांची मुलगी होती. कामानिमित्त बाहेर गेलेले वडील घरी परतल्यानंतर मनोजला नक्षल्यांनी नेल्याचे त्यांना समजले. मनोजला शोधण्याकरिता त्याचे वडील जंगलात गेले असता, नक्षल्यांनी त्यांची मनोजशी भेट घालून दिली व वडिलांना परत पाठविले.
जांभिया-गट्टा मार्गावरील नाल्याजवळनक्षल्यांनी त्याच्यावर गोळ्या झाडल्या. शुक्रवारी सायंकाळी हेडरी येथील आठवडी बाजारात पोलीस जवानाची हत्या केल्यानंतर त्याच रात्री मनोजचीही हत्या करण्यात आली. (प्रतिनिधी)