“लाडकी बहीण योजनेला स्वार्थी म्हणणे महिलांचा अपमान”; राज ठाकरेंना अजित पवार गटाचे उत्तर

NCP AP Group Sunil Tatkare Replied Raj Thackeray: लाडकी बहीण योजनेवरून राज ठाकरे यांनी केलेल्या टीकेला अजित पवार गटाच्या नेत्याने स्पष्ट शब्दांत उत्तर दिले.

NCP AP Group Sunil Tatkare Replied Raj Thackeray: 'मुख्यमंत्री माझी लाडकी बहीण' योजनेच्या माध्यमातून सरकारकडून महिलांना दर महिन्याला दीड हजार रुपये देण्यात येतात. या योजनेत आतापर्यंत कोट्यवधी महिलांनी अर्ज केले आहेत. तसेच कोट्यवधी रुपयांचा निधी महिलांच्या खात्यात वळते करण्यात आला आहे. लाडकी बहीण योजनेसाठी अर्ज करण्याची प्रक्रिया अजून सुरू आहे. ३० सप्टेंबरपर्यंत या योजनेची मुदत वाढवण्यात आली होती. आगामी विधानसभा निवडणुकीच्या पार्श्वभूमीवर ही मुदत आणखी वाढवली जाऊ शकते, अशी चर्चा आहे. लाडकी बहीण योजनेवरून राज ठाकरे यांनी केलेल्या टीकेला प्रत्युत्तर दिले जात आहे.

लाडकी बहीण योजनेबाबत बोलताना राज ठाकरे यांनी महायुती सरकारवर टीका केली. ऑक्टोबरचा पहिला हप्ता दिल्यानंतर जानेवारी महिन्यात पगार द्यायला सरकारच्या तिजोरीत पैसे नसणार. सत्ताधाऱ्यांच्या स्वार्थासाठी योजना तयार केल्या जात असतील तर त्याचा राज्यावर परिणाम होईल. राज्य खड्ड्यात घातले जात असेल तर हे चुकीचे आहे. महिलांना अशा प्रकारे पैसे न देता राज्यात नवीन उद्योग आणले पाहिजे, रोजगार दिला पाहिजे. समाजातील कोणताही घटक फुकट काही मागत नाही, या शब्दांत राज ठाकरे यांनी निशाणा साधला. 

महाराष्ट्रातील अडीच कोटी महिलांचा अवमान आहे

मुख्यमंत्री लाडकी बहीण योजनेबाबत राज ठाकरे काय बोलले? याबाबत मला काही माहिती नाही. पण मुख्यमंत्री लाडकी बहीण योजना स्वार्थी आहे, असे म्हणणे म्हणजे महाराष्ट्रातील अडीच कोटी महिलांचा अवमान आहे असे मानतो. आता राज ठाकरे नेमकी कोणत्या हेतूने बोललेत हे मला माहिती नाही. पण तुम्ही सांगितलेल्या माहितीवरून बोलत आहे. लाडकी बहीण योजनेबाबत राज ठाकरे यांचे जर ते वाक्य असेल तर ते योग्य नाही असे माझे स्पष्ट मत आहे, असा पलटवार राष्ट्रवादी काँग्रेस अजित पवार गटाचे नेते आणि खासदार सुनील तटकरे यांनी केला.

अशा प्रकारची वक्तव्य करणे हे दुर्देवी आहे

पत्रकारांशी बोलताना सुनील तटकरे यांना प्रणिती शिंदे यांनी लाडकी बहीण योजनेवर केलेल्या टीकेबाबतही विचारण्यात आले. एखाद्या योजनेबाबत बोलत असताना महिलांना लालूच दाखवली अशा प्रकारचा शब्द प्रयोग करणे म्हणजे त्या महिला असतानाही महिलांचा अपमान करत असल्याचे त्या विसरत आहेत. मला वाटते की, प्रणिती शिंदे यांनी त्यांच्या वक्तव्यावर आत्मपरीक्षण करावे आणि योग्य भूमिका घ्यावी. राजकीय विरोध समजू शकतो. महायुतीच्या सरकारला किंवा नेतृत्वाला तुम्ही दोष द्या. मात्र, अशा प्रकारचे वक्तव्य का करता? हे मला काही कळत नाही. ज्यांनी निवडणूक लढवेली आहे, त्यांनी अशा प्रकारची वक्तव्य करणे हे दुर्देवी आहे, असे सुनील तटकरे यांनी म्हटले आहे.