“देवेंद्र फडणवीस ज्युनिअरच्या हाताखाली उपमुख्यमंत्री म्हणून काम करतील हे स्वप्नातही वाटलं नाही”

एकनाथ शिंदे यांना मुख्यमंत्रीपदासाठी शुभेच्छा देताना एकनाथ खडसे यांनी नवे उपमुख्यमंत्री देवेंद्र फडणवीस यांना टोला लगावला.

मुंबई: एकामागून एक घडलेल्या अभूतपूर्व घडामोडींनंतर अखेर शिवसेना नेते एकनाथ शिंदे (Eknath Shinde) यांनी मुख्यमंत्रीपदाची तर, देवेंद्र फडणवीस (Devendra Fadnavis) यांनी उपमुख्यमंत्रीपदाची शपथ घेतली. यानंतर महाविकास आघाडीतील अनेक नेत्यांनी या नव्या सरकारला शुभेच्छा दिल्या. राष्ट्रवादी काँग्रेसचे ज्येष्ठ नेते एकनाथ खडसे (Eknath Khadse) यांनी एकनाथ शिंदे यांना शुभेच्छा देताना देवेंद्र फडणवीस यांना खोचक शब्दांत टोला लगावला आहे. 

अनेक दशके भाजपमध्ये काम केल्यानंतर ज्येष्ठ नेते यांनी राष्ट्रवादी काँग्रेस पक्षात प्रवेश केला. यानंतर राष्ट्रवादी काँग्रेसने त्यांना अलीकडेच झालेल्या विधान परिषद निवडणुकीत उमेदवारी दिली. या निवडणुकीत एकनाथ खडसे विजयी झाले. मात्र, दुसऱ्याच दिवशी सकाळी एकनाथ शिंदे यांनी बंडखोरी केल्याची बातमी धडकली आणि राज्यात मोठी खळबळ उडाली. सत्तासंघर्ष पराकोटीला पोहोचल्यानंतर अखेर उद्धव ठाकरे यांनी मुख्यमंत्रीपद तसेच विधान परिषदेच्या सदस्यत्वाचा राजीनामा दिला. या नाट्यमय घडामोडींनंतर आता नवे सरकार स्थापन होत आहे. 

नव्या सरकारवर शुभेच्छांचा वर्षाव

पंतप्रधान नरेंद्र मोदी, शरद पवार यांच्यापासून ते मावळते मुख्यमंत्री उद्धव ठाकरे यांच्यापर्यंत अनेकांनी नव्या सरकारला शुभेच्छा दिल्या. यातच एकनाथ खडसे यांनीही नव्या सरकारला शुभेच्छा दिल्या आहेत. देवेंद्र फडणवीस हे आपल्या ज्युनिअर मंत्र्याच्या हाताखाली उपमुख्यमंत्री म्हणून काम करतील असे स्वप्नातही वाटले नव्हते. एकनाथ शिंदे हे मुख्यमंत्री आणि देवेंद्र फडणवीस उपमुख्यमंत्री झाल्याने दोघांना माझ्या शुभेच्छा. मागच्या सरकारपेक्षा अधिक चांगले काम त्यांनी या ठिकाणी करावे. आणि महाराष्ट्रातील जनतेच्या अपेक्षांची पूर्तता यांनी करावी. घडलेले नाट्य हे अनअपेक्षित आहे. देवेंद्र फडणवीस यांना मुख्यमंत्री होण्याची खूप मोठी अपेक्षा पूर्ण झाले नाही,  परिस्थितीनुसार त्यांनी स्वीकारले, असे एकनाथ खडसे म्हणाले. 

देवेंद्र फडणवीस यांनी घेतली उपमुख्यमंत्रीपदाची शपथ

पत्रकार परिषदेवेळी देवेंद्र फडणवीस यांनी आपण मंत्रिमंडळाचा भाग असणार नाही. मात्र, एकनाथ शिंदे यांना लागेल ती सर्व मदत करणार असल्याचे सांगितले होते. मात्र, अवघ्या काही तासात भाजपचे राष्ट्रीय अध्यक्ष यांनी जेपी नड्डा यांनी देवेंद्र फडणवीस यांनी या नव्या मंत्रिमंडळात राहावे आणि उपमुख्यमंत्रीपद स्वीकारावे, असे निर्देश दिले. देवेंद्र फडणवीस उपमुख्यमंत्रीपद घेण्यासाठी तयार नव्हते. मात्र, खुद्द पंतप्रधान नरेंद्र मोदी यांनी देवेंद्र फडणवीस यांना एक नाही, तर दोनवेळा फोन करून उपमुख्यमंत्रीपद स्वीकारण्यासाठी आग्रह केला. अखेर पक्षादेश मान्य करून देवेंद्र फडणवीस यांनी राज्याचे उपमुख्यमंत्री म्हणून शपथ घेतली. पंतप्रधान नरेंद्र मोदी यांनी ट्विट करून देवेंद्र फडणवीस यांना धन्यवाद दिले आहेत. तसेच शुभेच्छाही दिल्या आहेत. 

दरम्यान, मुख्यमंत्रीपदाची शपथ घेतल्यावर, हा बाळासाहेबांच्या विराचारांचा आणि धर्मवीर आनंद दिघे यांच्या शिकवणीचा विजय असल्याचे एकनाथ शिंदे म्हणाले. राज्याचा विकास, सर्व घटकांना न्याय देण्याचे काम केले जाईल. सर्वांना सोबत, विश्वासात घेऊन काम केले जाईल. उपमुख्यमंत्री म्हणून देवेंद्र फडणवीसही सोबत आहेत. सर्वांच्या साथीनं विकासाचा गाडा पुढे नेण्याचे काम आम्ही करू, असेही ते म्हणाले. राज्याला पुढे नेण्यासाठी, विकासाठी कायम प्रयत्न करणार असल्याचेही त्यांनी स्पष्ट केले.