NCP vs BJP: "दिपोत्सवा'च्या आडून नक्की काय चाललंय ते मुंबईकरांना माहितीये"; राष्ट्रवादीचे टीकास्त्र

राष्ट्रवादीचे प्रवक्ते महेश तपासेंनी साधला भाजपावर निशाणा

NCP vs BJP, Deepotsav: महाराष्ट्राच्या राजकारणात कधी काय घडेल याचा अंदाज बांधणे खूपच कठीण आहे. २०१९ला युतीमध्ये निवडणुका लढून नंतर शिवसेनेने काँग्रेस-राष्ट्रवादीशी हातमिळवणी केली आणि महाविकास आघाडीचे सरकार स्थापित झाले. त्यानंतर २०२२मध्ये शिवसेनेचे पहिल्या फळीतील नेते एकनाथ शिंदे यांनी बंडखोरी करत भाजपासोबत येऊन सत्तास्थापना केली. आता खरी शिवसेना नक्की उद्धव ठाकरेंची की एकनाथ शिंदे यांची, यावर अजून निर्णय आलेला नाही. तशातच, मुंबई क्रिकेट असोसिएशनच्या निवडणुकीत, उद्धव ठाकरेंचे निकटवर्तीय मिलिंद नार्वेकर, राष्ट्रवादीचे अध्यक्ष शरद पवार, मुख्यमंत्री एकनाथ शिंदे, उपमुख्यमंत्री देवेंद्र फडणवीस, भाजपा मुंबई अध्यक्ष आशिष शेलार यांनी एकत्रितपणे आपला उमेदवार जिंकवून आणला. आणि त्यानंतर, काल दिवाळीच्या मुहूर्तावर दादरच्या शिवाजी पार्कवरील दिपोत्सवासाठी मनसे अध्यक्ष राज ठाकरे हे मुख्यमंत्री व उपमुख्यमंत्री यांच्यासमवेत उपस्थित राहिल्याचे दिसले. यावरून, मनसे-बाळासाहेबांची शिवसेना-भाजपा यांची महायुती होणार का, अशी चर्चा रंगली आहे. त्याच मुद्द्यावरून राष्ट्रवादीने मात्र भाजपावर टीकास्त्र सोडले.

"प्रत्येक सण-उत्सवांना राजकीय रंग देणे ही भाजपाची जुनीच रणनिती आहे. आगामी मुंबई महापालिकेच्या निवडणुकांवर नजर असल्याने भाजपाने मनसेच्या दीपोत्सवासाठी हजेरी लावली. या कार्यक्रमाच्या माध्यमातून शिवसेना आणि मुंबई महापालिकेवर निशाणा साधला जात आहे. मुंबईतील मराठी माणसाचे हित नक्की कशात आहे? मुंबईकर रहिवासी मंडळी आनंदी आणि सुरक्षित आहेत का? मुंबईकरांना आरोग्य, रोजगार आणि वाहतुकीच्या काय समस्या आहेत? या साऱ्या महत्त्वाच्या प्रश्नांवर भाजपाचे लोक काहीच बोलायला तयार नाहीत. पण कालच्या दीपोत्सवाच्या कार्यक्रमात हजेरी लावून आम्ही खूप मोठं काहीतरी करून दाखवलं आहे, असा आवेश भाजपा आणत आहे. मुंबईची जनता भोळी नाही तर सूज्ञ आहे. दिवाळी व दिपोत्सवाच्या आडून नक्की काय राजकारण सुरू आहे, याची मुंबईकरांना पूर्ण कल्पना आहे", असे रोखठोक मत राष्ट्रवादीचे प्रवक्ते महेश तपासे यांनी व्यक्त केले.

दरम्यान, मनसे अध्यक्ष राज ठाकरे यांनी हिंदुत्वाचा मुद्दा अधिक प्रखरपणे मांडल्यापासून ते चर्चेत आले आहेत. सुरूवातीला त्यांनी मशिदींवरील भोंग्याचा मुद्दा मांडला. तसेच राष्ट्रवादी काँग्रेसचे अध्यक्ष शरद पवार यांच्यावरही राज यांनी सडकून टीका केली होती. तशातच आता दिपोत्सवासाठी राज ठाकरे-एकनाथ शिंदे- देवेंद्र फडणवीस एकाच मंचावर असल्याने ही नव्या राजकीय समीकरणाची नांदी आहे की काय अशा चर्च रंगल्या आहेत.