मला अभिमान, आज बाळासाहेब आणि माँ यांची आठवण येते; उद्धव ठाकरेंच्या आवाहनानंतर सुप्रिया सुळे भावूक

पुन्हा एकदा मुख्यमंत्री उद्धव ठाकरे यांनी बंडखोर आमदारांना चर्चेचं आवाहन केलं आहे. यानंतर सुप्रिया सुळे भावूक वक्तव्य केलं आहे.

सध्या महाराष्ट्रातील राजकीय वातावरण ढवळून निघत आहे. शिवसेनेच्या अनेक आमदारांनी एकनाथ शिंदे यांच्या गटाला साथ दिली आहे. तर दुसरीकडे बंडखोर आमदार शिवसेनेनं भाजपसोबत युती करण्याची मागणी करत आहे. दरम्यान, आता पुन्हा एकदा मुख्यमंत्री उद्धव ठाकरे यांनी बंडखोर आमदारांना चर्चेचं आवाहन केलं आहे. यानंतर राष्ट्रवादी काँग्रेसच्या खासदार सुप्रिया सुळे भावूक वक्तव्य केलं आहे.

“मला उद्धव ठाकरेंचा अभिमान वाटतो. घरातील मोठा भाऊ कसा असावा तर तो उद्धव ठाकरेंसारखा असावा असं वाटतं. त्यांनी दाखवलेल्या भावना मनाचा मोठेपणा असतो. आज मला मा आणि बाळासाहेबांची आठवण येते. त्यांच्यातील असलेली संवेदनशील उद्धव ठाकरेंच्या कृती आणि वागण्यात दिसते. बाळासाहेबांनी सर्वांनाच प्रेम दिलंय. त्यांनी हयात असताना उद्धव ठाकरेंना त्यांनी आपला उत्तराधिकारी म्हणून जबाबदारी दिली. जर प्रेमानं उद्धव ठाकरे करत असतील तर एक मोठं भावनिक आवाहन आहे. राजकारणात यश अपयश, चढ उतार येत असतात,” असं सुप्रिया सुळे म्हणाल्या.

काय म्हणाले होते उद्धव ठाकरे?
आपण गेल्या काही दिवसांपासून गुवाहाटी येथे अडकून पडलेले आहात . आपल्या बाबत रोज नवीन माहिती समोर येत आहे , आपल्यातील बरेच संपर्कातही आहेत आपण आजही मनाने शिवसेनेत आहात . आपल्यापैकी काही आमदारांच्या कुटुंबातील सदस्यांनी देखील संपर्क साधून आपल्या मनातील भावना मला कळवल्या आहेत , आपल्या भावनांचा मी शिवसेनेचा कुटुंबप्रमुख म्हणून आदर करतो , कुटुंबप्रमुख म्हणून तुम्हाला मनापासून सांगतो अजूनही वेळ गेलेली नाही , माझं आपल्याला सगळ्यांना आवाहन आहे , आपण या माझ्या समोर बसा , शिवसैनिकांच्या आणि जनतेच्या मनातील संभ्रम दूर करा , यातून निश्चित मार्ग निघेल , आपण एकत्र बसून यातून मार्ग काढू . कोणाच्याही कोणत्याही भूल थापांना बळी पडू नका , शिवसेनेने जो मान सन्मान तुम्हाला दिला तो कुठेही मिळू शकत नाही , समोर आलात बोललात तर मार्ग निघेल .  शिवसेना पक्ष प्रमुख आणि कुटुंब प्रमुख म्हणून आजही मला तुमची काळजी वाटत आहे . समोर येऊन बोला आपण मार्ग काढू.