'वैभव नाईकांची शिंदेंकडे उठबस, ते केवळ तनाने ठाकरेंसोबत, तर मनाने..' नितेश राणेंचा सनसनाटी दावा

Vaibhav Naik News: जे सकाळचा नाश्ता एकनाथ शिंदेंच्या घरात करतात आणि रात्री निघताना वर्षावरून निघतात, अशा वैभव नाईक यांनी त्यांचा दिनक्रम उद्धव ठाकरेंना दाखवावा, असे नितेश राणे म्हणाले.

एकनाथ शिंदेंनी केलेल्या बंडखोरीनंतर शिवसेनेत उभी फूट पडून अनेक आमदार हे एकनाथ शिंदेंसोबत गेले होते. मात्र काही आमदारांनी उद्धव ठाकरेंसोबत राहणं पसंत केलं होतं. मात्र यातील काही आमदार हे एकनाथ शिंदेंच्या संपर्कात असल्याचा दावा शिवसेना शिंदे गट तसेच भाजपाकडून करण्यात येत असतो. दरम्यान, ठाकरे गटातील आघाडीच्या आमदारांपैकी एक असलेल्या वैभव नाईक यांच्याबाबत नितेश राणेंनी सनसनाटी दावा केला आहे. वैभव नाईक हे केवळ तनाने उद्धव ठाकरेंसोबत असून, ते मनाने कधीच एकनाथ शिंदेंसोबत गेले आहेत, असा दावा नितेश राणे यांनी केला आहे. 

शिंदे गट हा लवकरच भाजपामध्ये विलीन होईल. तसेच शिंदेंना दसरा मेळावा घ्यायचा असेल तर तो त्यांनी तो भाजपाच्या कार्यालयातून घ्यावा अशी टीका वैभव नाईक यांनी केली होती. त्याबाबत पत्रकारांनी विचारलं असता नितेश राणे म्हणाले की, जो आमदार सकाळचा चहा-नाश्ता आणि रात्रीचं जेवण एकनाथ शिंदे यांच्या कार्यालयात करतो. त्याने आम्हा लोकांवर भाजप आणि एकनाथ शिंदे यांच्यावर टीका करू नये. जे सकाळचा नाश्ता एकनाथ शिंदेंच्या घरात करतात आणि रात्री निघताना वर्षावरून निघतात, अशा वैभव नाईक यांनी त्यांचा दिनक्रम उद्धव ठाकरेंना दाखवावा. वैभव नाईक हे केवळ शरीराने ठाकरेंसोबत आहेत. ते मनाने कधीच एकनाथ शिंदेंसोबत गेले आहेत, असा दावा नितेश राणे यांनी केला आहे.

पुढच्या निवडणुकीत एकनाथ शिंदेंचे मंत्री भाजपाच्या चिन्हावर लढतील, या संजय राऊत यांनी केलेल्या दाव्यालाही नितेश राणे यांनी प्रत्युत्तर दिले आहे. संजय राऊत यांनी आधी त्यांचा भाऊ मशालीवर लढणार आहे की घड्यावर लढणार आहे की शरद पवार यांच्या पक्षाच्या चिन्हावर लढणार आहे, हे जाहीर करावं, त्यानंतर इतरांना कमळ चिन्हाचे सल्ले द्यावेत, असा टोला नितेश राणे यांनी लगावला.