पुण्यात अल्पवयीन चोरांकडून 25 बाईक्स जप्त

गेल्या अनेक दिवसांपासून पोलिसांच्या हातावर तुरी देणा-या दोन सराईत अल्पवयीन चोरांसह तीन जणांना वाकड पोलिसांनी अटक केली आहे. धक्कादायक बाब म्हणजे या तिघांकडून चोरी केलेल्या 25 बाईक्स जप्त करण्यात आल्या आहेत.  

वाकड (पुणे), दि. 31 - गेल्या अनेक दिवसांपासून पोलिसांच्या हातावर तुरी देणा-या दोन सराईत अल्पवयीन चोरांसह तीन जणांना वाकड पोलिसांनी अटक केली आहे. धक्कादायक बाब म्हणजे या तिघांकडून चोरी केलेल्या 25 बाईक्स जप्त करण्यात आल्या आहेत.  केशव शेटे ( वय 34 ) यांच्यासह वाकड महातोबा नगर येथील दोन अल्पवयीन चोरट्यांना अटक केली आहे. या प्रकरणी वाकड तपास पथकाचे सहायक निरीक्षक बालाजी पांढरे यांनी दिलेल्या माहितीनुसार,  तपास पथकातील पोलीस नाईक यादव यांना म्हातोबा नगर येथे राहणारे दोन अल्पवयीन चोर केवळ चैन करण्यासाठी चोऱ्या करत असल्याची महिती मिळाली. त्यानुसार सापळा रचून या चोरांना वाकड येथून ताब्यात घेण्यात आले. 

ताब्यात घेतल्यानंकर चोरट्यांनी वाकड, भोसरी, दिघी, आणि पिंपरी पोलीस ठाण्याच्या हद्दीत एकूण 18 बाईक्स चोरल्याची महिती समोर आली. या तपासादरम्यान बीड परळी येथील केशव शेटे या सराईत चोरट्यानेदेखील शहरात अनेक चोऱ्या केल्याची माहिती पोलीस नाईक एम. आर. नदाफ यांना मिळाली. त्यांनी तात्काळ बीड येथे सापळा रचून शेटेला अटक केली. 

त्याने शहरातील विविध पोलीस ठाण्याच्या हद्दीतून ७ बाईक्स चोरल्याची कबुली दिली. ही कामगिरी पोलीस निरीक्षक श्रीधर जाधव यांच्या मार्गदर्शनाखाली तपास पथकाचे सहायक निरीक्षक बालाजी पांढरे कर्मचारी धनराज किरनाळे, दादा पवार, के.एल. बनसुडे, गणेश हजारे, एम.आर.नदाफ, शाम बाबा यांनी केली .