डाळी पुन्हा कडाडल्या

पुणे, दि. 3 - मागील आठवड्यापर्यंत सर्वसामान्यांच्या आवाक्यात येवू लागलेल्या डाळी पुन्हा कडाडल्या आहेत. घाऊक बाजारात तुरडाळीसह हरभरा डाळीनेही शंभरीचा टप्पा ओलांडला आहे. आठवडाभरात दोन्ही डाळींचे भाव क्विंटलमागे दीड ते दोन हजार रुपयांनी वाढले. परिणामी किरकोळ बाजारातही डाळींचे भाव पुन्हा जैसे थे झाले आहेत. 

 

गुलटेकडी येथील मार्केटयार्डातील घाऊक बाजारात मागील वर्षभर शंभरीच्या पुढे गेलेल्या तुरडाळीने दहा दिवसांपुर्वी दीड वर्षांतील भावाचा नीचांक गाठला होता. हे भाव क्विंटलमागे ७५०० ते ८५०० रुपयांपर्यंत खाली आले होते. मार्च २०१५ मध्ये तुरडाळीचे भाव क्टिंटलमागे सुमारे ८५०० ते ८००० रुपये एवढे होते. त्यामुळे पुढील काही दिवसांत हे भाव आणखी घसरण्याची शक्यता व्यापाºयांनी व्यक्त केली होती. मात्र, प्रत्यक्षात तुरडाळीसह हरभरा, मुगडाळ व मटकी डाळीचे भाव पुन्हा वाढू लागले आहेत. मागील काही महिन्यांत बाजारात डाळींचे आवक मोठ्या प्रमाणावर होत होती. केंद्र व राज्य शासनाच्या विविध प्रयत्नांमुळे भावही आटोक्यात येवू लागले होते. त्यामुळे बाजारात मुबलक प्रमाणात डाळी उपलब्ध झाल्या होत्या. त्यामुळे शासनाच्या ९५ रुपये प्रति किलो भावाच्या तुरडाळीकडेही ग्राहकांनी पाठ फिरवली होती. 

 

सद्यस्थितीत डाळींचा साठा कमी होवू लागल्याने साठेबाजांनी पुन्हा साठेबाजी करण्यास सुरूवात केली आहे. त्यामुळे जागेवरच डाळींचे भाव वाढले आहेत. मात्र, आठवडाभरात अपेक्षेपेक्षा अधिक भाववाढ झाली आहे. दि. ३० आॅगस्टपर्यंत भाव कमी होत चालले होते. त्यानंतर मात्र, भावाने अचानक उसळी घेतली. पुढील काही दिवस ही भाववाढ कायम राहण्याची शक्यता व्यापारी विजय राठोड यांनी व्यक्त केली. 

 

घाऊक बाजारात सध्या तुरडाळीचे भाव क्विंटलमागे ९५०० ते १०, ७०० रुपये तर हरभरा डाळीचे ९२०० ते १०,२०० रुपयांपर्यत गेले आहेत. आठवडाभरापासून दररोज भावात सातत्याने वाढ होत असल्याने तुलनेने १५०० ते २००० हजार रुपयांनी डाळी महागल्या आहेत. पुढील एक-दोन आठवडेही डाळींसाठी तेजीचे राहणार आहेत. त्यामुळे किरकोळ बाजारावरही याचा परिणाम होणार असून दुकानदारांकडून वाढीव भावाने ग्राहकांना डाळींची विक्री केली जाण्याची शक्यता आहे. 

 

तीन आठवड्यांतील डाळींचे भाव (क्विंटलमागे रुपयांत) 

दि. २० ऑगस्ट दि. २७ ऑगस्ट दि. ३ सप्टेंबर 

तुरडाळ ८५००-१०००० ७५००-८५०० ९५००-१०७०० 

हरभराडाळ ९०००-९६०० ८०००-८५०० ९२००-१०२०० 

मुगडाळ ६५००-७००० ६०००-६२०० ६५००-७००० 

मसुरडाळ ६८००-६९०० ६७००-६८०० ६६००-६७०० 

मटकीडाळ ८०००-८२०० ७०००-७२०० ७५००-८०००