पुण्यात अभिनेता आरोह वेलणकरला मारहाण

लवकर साईड न दिल्याच्या कारणावरुन अभिनेता आरोह वेलणकरला दोन मदयधुंद तरुणांनी मारहाण केल्याची घटना सायंकाळी पाचच्या सुमारास कर्वे रस्त्यावर कलिंगा

ऑनलाइन लोकमत

पुणे, दि.05 - लवकर साईड न दिल्याच्या कारणावरुन अभिनेता आरोह वेलणकरला दोन मदयधुंद तरुणांनी मारहाण केल्याची घटना सायंकाळी पाचच्या सुमारास कर्वे रस्त्यावर कलिंगा हॉटेलसमोर घडली. याप्रकरणी डेक्कन पोलिसांनी दोघांना अटक केली आहे.

 

प्रवीण ज्ञानेश्वर मोहळ (वय २९, रा. आझादनगर, कोथरूड), संग्राम सुदाम तांगडे (वय २९, रा. गृहकल्प सोसायटी, कर्वेरस्ता) अशी अटक केलेल्यांची नावे आहेत. याप्रकरणी आरोह वेलणकर याने फिर्याद दिली आहे. पोलिसांनी दिलेल्या माहितीनुसार, कर्वे रस्त्यावरील कलिंगा हॉटेल समोर आरोह हा त्याच्या मित्राची वाट पहात चारचाकीमध्ये बसलेला असताना पाठीमागून आलेल्या चारचाकी चालकाने मोठ्याने हॉर्न वाजविला.

 

त्यामुळे आरोहने गाडी बाजूला घेऊन त्यास जाण्यास सांगितले. त्यावेळी त्यातील एक जण गाडीतून उतरून आरोहला शिवीगाळ करत मारहाण करण्यास सुरुवात केली. तर त्यातील दुस-याने गाडीवर दगड मारून काच फोडण्याचा प्रयत्न केला. दोघेही मद्यधुंद अवस्थेत होते.  याबाबत आरोहने पोलिसांकडे तक्रार करताच डेक्कन पोलिसांनी त्यांचा शोध घेऊन दोघांना अटक केली.