राज्यसेवा पूर्वपरीक्षेसाठी ३३ टक्के गुणांचा नियम; महाराष्ट्र लोकसेवा आयोगाचे नोटिफिकेशन

मुख्य परीक्षेसाठी क्वालिफाय करण्यासाठी आयोगाने या पेपर २मध्ये किमान ३३ टक्के गुण मिळवणे बंधनकारक केले आहे.

लोकमत न्यूज नेटवर्क  

पुणे : महाराष्ट्र लोकसेवा आयोगाने (एमपीएससी) राज्यसेवा पूर्वपरीक्षेसाठी सामान्य अध्ययन पेपर १ (२०० गुण) आणि सामान्य अध्ययन पेपर २ (२०० गुण) या दोन पेपरपैकी सामान्य अध्ययन पेपर २ला अर्हताकारी नियम लागू (क्वालिफाय) केला आहे. 

मुख्य परीक्षेसाठी क्वालिफाय करण्यासाठी आयोगाने या पेपर २मध्ये किमान ३३ टक्के गुण मिळवणे बंधनकारक केले आहे. या पेपरमध्ये ३३ टक्के गुण मिळवणाऱ्या विद्यार्थ्यांची पेपर १मधील गुणांच्या आधारे आता मुख्य परीक्षेसाठी गुणवत्ता यादी यापुढे जाहीर करण्यात येणार आहे. युपीएससीच्या धर्तीवर फायदा होणार असल्याने विद्यार्थ्यांनी या निर्णयाचे स्वागत केले आहे.

सामान्य अध्ययन पेपर १ आणि २ मधील निर्णय निर्धारण व समस्येचे निराकारण (डिसिझन मेकिंग ॲण्ड प्रॉब्लेम सॉल्विंग)चे प्रश्न वगळून उर्वरित प्रश्नांकरिता नकारात्मक गुणदान लागू राहणार आहे, तसेच प्रत्येक चुकीच्या उत्तराकरिता २५ टक्के किंवा १/४ एवढे गुण एकूण गुणांमधून वजा, तसेच एखाद्या प्रश्नाची एकापेक्षा अधिक उत्तरे लिहिल्यास २५ टक्के गुण वजा करण्यात येणार आहेत. त्याचबरोबर एखादा प्रश्न अनुत्तरित असेल, तर अशाप्रकरणी नकारात्मक गुणांची पद्धत लागू असणार नाही, असे आयोगाने बुधवारी काढलेल्या नोटिफिकेशनमध्ये म्हटले आहे. परीक्षेची पद्धत वैकल्पिक (ऑब्जेक्टिव्ह) आहे.