"संजय राऊत महागद्दार, तो राष्ट्रवादीच्या दावणीला बांधलेला....”; आमदार बांगर यांची बोचरी टीका

Sanjay Raut vs Santosh Bangar: राऊत आणि शिंदे गट यांच्यात कायमच शाब्दिक चकमक पाहायला मिळते

Sanjay Raut vs Santosh Bangar: गेल्या वर्षी महाराष्ट्रात मोठी राजकीय उलथापालथ झाली. शिवसेनेत उभी फूट पडून एकनाथ शिंदे काही आमदारांसह सूरत आणि गुवाहाटीला निघून गेले. त्यानंतर ३९ आमदारांच्या पाठिंब्याने त्यांनी भाजपासोबत सत्तास्थापना केली. काही दिवसांपूर्वी शिंदे गट हीच खरी शिवसेना असल्याचे निवडणूक आयोगाने सांगितले. त्यानंतर संजय राऊत सातत्याने शिंदे गटावर टीका करताना दिसत आहेत. पण आता शिंदे गटाचे आमदार संतोष बांगर यांनी ठाकरे गटाचे खासदार संजय राऊत यांच्यावर जोरदार टीका केली. तसेच, त्यांची थेट कुत्र्याशी तुलना केली.

संजय राऊतांची थेट कुत्र्याशी तुलना

"संजय राऊत हे खोक्यांवरून जी टीका करतात, त्याचा आता कंटाळा आला आहे. संजय राऊत ज्या आमदारांना खोके-खोके म्हणत आहेत, त्याच आमदारांच्या जीवावर हा खासदार झालाय. म्हणून मला वाटतं की, संजय राऊत यांनी आपल्या पदाचा राजीनामा द्यावा आणि पुन्हा निवडणुकीला सामोरं जावं. संजय राऊत हा महागद्दार आहे. त्याने शिवसेना संपवून टाकली. संजय राऊत हा राष्ट्रवादी काँग्रेसच्या दावणीला बांधलेला कुत्रा आहे. आम्हाला उचकवण्याचा प्रयत्न करू नका. संजय राऊतांना पुन्हा सांगायचं आहे की, तुम्ही शिवसेना संपवली आहे. शिवसेनेला तुम्ही कुठे नेऊन ठेवलं आहे, हे महाराष्ट्राची जनता बघत आहे," असा सणसणीत हल्लाबोल बांगर यांनी केला.

उद्धव ठाकरे गटाचे खासदार संजय राऊत यांनी शिंदे सरकारच्या 'आनंदाचा शिधा’ योजनेवरून शिंदे फडणवीस सरकारवर टीका केली होती. "आनंदाचा शिधा अद्याप लोकांपर्यंत पोहोचला नाही. पण तो शिधा खोक्याच्या मार्फत सर्व ४० आमदारांना मिळाला आहे," अशा शब्दांत संजय राऊतांनी शिंदे गटाला डिवचलं होतं. राऊतांच्या या टीकेबद्दल विचारलं असता संतोष बांगर यांनी संतप्त प्रतिक्रिया दिली. त्यांनी संजय राऊतांशी तुलना थेट कुत्र्याशी केली.