सत्यपाल महाराजांवर मुंबईत प्राणघातक हल्ला

प्रसिद्ध सप्त खंजेरीवादक सत्यपाल महाराज चिंचोळकर यांच्यावर शुक्रवारी मुंबईत प्राणघातक हल्ला झाला. त्यात ते गंभीर झाले होते. त्यांच्यावर केईएम रुग्णालयात

आकोट (जि. अकोला) : प्रसिद्ध सप्त खंजेरीवादक सत्यपाल महाराज चिंचोळकर यांच्यावर शुक्रवारी मुंबईत प्राणघातक हल्ला झाला. त्यात ते गंभीर झाले होते. त्यांच्यावर केईएम रुग्णालयात उपचार
करण्यात आले. त्यांना मंगळवारी रुग्णालयातून सोडण्यात आले. भोईवाडा पोलिसांनी हल्लेखोर कुणाल किशोर जाधव यास अटक केली असून त्याच्या विरोधात गुन्हा दाखल केला आहे.
अंधश्रद्वा, व्यसनमुक्ती आणि अनिष्ठ रुढी परंपरांविरुद्ध सत्यपाल महाराज प्रहार करतात. महाराष्ट्रातील एक अग्रणी प्रबोधनकार म्हणून त्यांची ओळख आहे. बुद्ध जयंतीनिमित्त मुंबईतील नायगाव (दादर) येथे त्यांचा शुक्रवारी कार्यक्रम झाला.
कार्यक्रम संपल्यानंतर अनेकांनी महाराजांसोबत छायाचित्र काढले. या गर्दीत तोंडाला रुमाल बांधून किशोर जाधव हा युवक त्यांच्याजवळ पोहोचला. त्याने महाराजांच्या खांद्यावर हात ठेवत
असल्याचे दाखवित चाकूने त्यांच्या पोटावर वार केले. सत्यपाल महाराजांनी तातडीने स्वत:ला
सावरुन हल्ला चुकविण्याचा प्रयत्न केला. हल्लेखोर पळून जाण्याच्या तयारीत असताना उपस्थितांना त्याला पकडले.
जखमी सत्यपाल
महाराजांना लगेचच केईएम रुग्णालयात उपचारासाठी दाखल करण्यात आले. त्यांनी भोईवाडा पोलीस स्टेशनमध्ये फिर्याद दाखल केली असून, आरोपी किशोर जाधवविरुद्ध गुन्हा दाखल करण्यात आला आहे. पोलीस त्याची चौकशी करत आहेत.

शेवटच्या श्वासापर्यंत प्रबोधन करणार
मी फुले, शाहू, आंबेडकर यांच्या विचारसरणीचा असून, संत तुकडोजी महाराज, गाडगे महाराज यांच्या विचारांचा प्रचार प्रसार राज्यभर करतो. समाजातील अंधश्रद्धा दूर होण्याकरिता समाज प्रबोधन करतो. अंधश्रद्धेला विरोध करणाऱ्या नरेंद्र दाभोळकर, गोविंद पानसरे, कलबुर्गी यांची हत्या करण्यात आली. शुक्रवारी माझ्यावरही हल्ला झाला. या हल्ल्याने आपण विचलीत झालो नसून, शेवटच्या श्वासापर्यंत आपण महाराष्ट्रात प्रबोधन करुन समाजात जनजागृती करणार.
- सत्यपाल महाराज, सप्त खंजेरीवादक