आमीरच्या भेटीवरुन साताऱ्यात वादंग !

'वॉटर कप' स्पर्धेसाठी रविवारी साताऱ्यात आलेल्या अभिनेता आमीर खानचा खाजगी दौरा जिल्ह्यात भलताच वादग्रस्त ठरला.

ऑनलाइन लोकमत

सातारा, दि. १७ -   'वॉटर कप' स्पर्धेसाठी रविवारी साताऱ्यात आलेल्या अभिनेता आमीर खानचा खाजगी दौरा जिल्ह्यात भलताच वादग्रस्त ठरला. सुटीच्या दिवशी अख्खं प्रशासन जिल्हाधिकारी कार्यालयात आमीरच्या दिमतीला आलेलं पाहून चिडलेल्या स्थानिक आमदारांनी अधिकाऱ्यांवर जोरदार टिकास्त्र सोडलं.  

   

'दुष्काळावर मात करत असल्याची कार्पोरेट शोबाजी बंद करा अन अगोदर दुष्काळग्रस्तांसाठी मूलभूत गरज असलेल्या टँकर - छावण्यांचे प्रस्ताव मंजूर करा,' अशा भाषेत राष्ट्रवादीचे माजी मंत्री शशिकांत शिंदे अन कॉंग्रेसचे आमदार जयकुमार गोरे यांनी प्रशासनाला टार्गेट केलं. 

   

रविवारी साताऱ्यात आमीरनं दुष्काळी भागातील 'वॉटर कप' स्पर्धेवर चर्चा करण्यासाठीअधिकाऱ्यांची मिटींग घेतली, यावेळी जिल्ह्यातील अनेक प्रमुख अधिकारी उपस्थित होते. यावेळी बाहेर पोलिसांचा प्रचंड बंदोबस्त ठेवण्यात आला होता. मात्र, टँकरची मागणी करण्यासाठी भेटायला आलेल्या कार्यकर्त्यांना  बाहेरच्या बाहेरच हाकलून दिल्यानंतर संतापाची लाट उसळली. दोन्ही कॉंग्रेसचे आमदारही यानंतर प्रशासनाच्या भूमिकेवर तुटून पडले.