गोव्यात लेट येणा-या सरकारी अधिका-यांना पाठवले घरी

मुख्यमंत्री मनोहर पर्रिकर यांच्या नेतृत्वाखाली गोव्यात सरकार स्थिरस्थावर होताच कार्यालयात उशिराने पोहोचणा-या सरकारी अधिका-यांवर कारवाईचा बडगा उगारण्यात आला आहे.

 ऑनलाइन लोकमत 

पणजी, दि. 29 - मुख्यमंत्री मनोहर पर्रिकर यांच्या नेतृत्वाखाली गोव्यात सरकार स्थिरस्थावर होताच कार्यालयात उशिराने पोहोचणा-या सरकारी अधिका-यांवर कारवाईचा बडगा उगारण्यात आला आहे. मापूसातील सरकारी कार्यालयात उशिरा पोहचलेल्या 14 जिल्हस्तरीय अधिका-यांना गोव्याचे महसूल मंत्री रोहन खाऊंटे यांनी दोन दिवसांसाठी निलंबित केले. 

 

खाऊंटे यांनी बुधवारी उत्तर गोव्यातील मापूसा येथील सरकारी कार्यालयांना अचानक भेट दिली. यावेळी उशिराने पोहोचलेल्या 14 अधिका-यांना दोन दिवसांसाठी निलंबित केले. वाहतूक कोंडीमुळे 15 मिनिटे उशिर झाल्यास समजून घेता येईल पण त्यापेक्षा उशिर करणा-यांवर कारवाई केली असे खाऊंटे यांनी सांगितले. 

 

वेळेमध्ये सेवा देण्याचे आपण आश्वासन दिले आहे त्यामुळे सरकारी कर्मचा-यांनी वेळ पाळली पाहिजे असे खाऊंटे यांनी सांगितले. मूळचे उद्योगपती असलेले रोहन खाऊंटे उत्तर गोव्यातील पॉरवोरीम विधानसभा मतदारसंघाचे आमदार आहेत. भाजपाशासित राज्यांमध्ये सरकारी अधिकारी आणि कर्मचा-यांना वेळेवर ऑफीसमध्ये पोहण्याचे आदेश आहेत. उत्तरप्रदेशचे मुख्यमंत्री योगी आदित्यनाथ यांनी सुध्दा सरकारी अधिका-यांना वेळेवर कार्यालयात पोहोचण्याचे आदेश दिले आहेत.