ती हत्या ‘आॅनर किलिंग’

माहूर येथील रामगड किल्ल्यावर प्रेमी युगुलाची झालेली हत्त्या आॅनर किलिंगचा प्रकार असल्याचे उघड झाले आहे. सुपारी देऊन हत्या केल्याचे पुढे आले असून नांदेड पोलिसांनी मुलीचे वडील, काका,

माहूर येथील शाहरूख-निलोफर दुहेरी हत्याकांड
माहूर/पुसद (यवतमाळ) : माहूर येथील रामगड किल्ल्यावर प्रेमी युगुलाची झालेली हत्त्या आॅनर किलिंगचा प्रकार असल्याचे उघड झाले आहे. सुपारी देऊन हत्या केल्याचे पुढे आले असून नांदेड पोलिसांनी मुलीचे वडील, काका, चुलत भावासह दोन मध्यस्थांना अटक केली आहे. आतापर्यंत या प्रकरणात अटक झालेल्यांची संख्या ११ झाली आहे.
वडील मिर्झा खालिद बेग कमर बेग (४८) रा.गांधीनगर पुसद, काका नबाब जानी कमर बेग (५५), चुलत भाऊ विकार अहेमद नबाब जानी बेग (२८) दोघेही रा.फुलसावंगी ता.महागाव आणि मध्यस्थ अभियंता कंत्राटदार सैयद अन्वर अली सत्तार अली (४४) रा.मजिद वॉर्ड, पुसद, कैसर मिर्झा बहद्दूर मिर्झा (४४) रा.माहूर जामा मशिदच्या मागे अशी आरोपींची नावे आहे. त्यांना बुधवारी सायंकाळी नांदेड पोलिसांनी अटक केली. तर यापूर्वी सुपारी घेणाऱ्या सहा जणांना अटक करण्यात आली होती. या प्रकरणात मुलीचे वडील, काका, चुलत भाऊ आरोपी असल्याचे निष्पन्न झाल्याने हा प्रकार आॅनर किलिंगचा असल्याचे शिक्कामोर्तब झाले आहे.
पुसद येथील अभियांत्रिकी महाविद्यालयात शिक्षण घेणारी विद्यार्थिनी निलोफर खालिद बेग आणि तिचा प्रियकर शाहरूख फिरोज खान पठाण रा.उमरखेड या दोघांची १० सप्टेंबर रोजी माहूर येथील रामगड किल्ल्यात निर्घृण हत्या करण्यात आली होती. हत्ती दरवाजाजवळ या दोघांचेही मृतदेह आढळले होते. डोक्यात, मानेवर व गळ्यावर तीक्ष्ण हत्याराचे वार होते. परंतु त्यावेळी नेमके आरोपी कोण, हे कळायला मार्ग नव्हता.
आरोपींचा शोध लागत नसल्याने नांदेड पोलीस अधीक्षकांनी हा तपास स्थानिक गुन्हे शाखेकडे दिला. त्यानंतर तब्बल दीड महिन्याने २८ आॅक्टोबर रोजी पोलिसांनी राजू ऊर्फ राजा रघुनाथ गाडेकर, शेख जावेद ऊर्फ पेंटर शेख हुसेन, रंगराव शामराव बाबटकर, शेषराव ऊर्फ पिंटू शामराव बाबटकर, कृष्णा ऊर्फ बाबू मारोतराव शिंदे यांना अटक केली. त्यांची कसून चौकशी सुरू झाली.
मात्र यातील मुख्य सूत्रधार रघुनाथ ऊर्फ रघू डॉन ऊर्फ रघू रोकडा नाना पळसकर हा पसार होता. त्याला २ नोव्हेंबर रोजी अटक करण्यात आली. या सर्वांची कसून चौकशी केली असता त्यांनी सुपारी घेऊन खून केल्याची कबुली दिली. तसेच गुन्ह्यात वापरलेले शस्त्र आणि इतर साहित्यही काढून दिले होते.
त्यावरून पोलिसांनी सुपारी देणाऱ्यांचा शोध जारी केला. दरम्यान, सैयद अन्वर अली आणि कैसर मिर्झा या दोघांना संशयावरून ताब्यात घेतले. परंतु या हत्त्याकांडाचे गूढ उकलत नव्हते.
शेवटी पोलिसी खाक्या दाखविताच या हत्याकांडाचे गूढ उकलले. दरम्यान, या प्रकरणात अटक केलेल्या वडिलांसह पाच आरोपींना नांदेड पोलिसांनी गुरुवारी न्यायालयापुढे हजर केले. सदर गुन्ह्यात आरोपींनी रचलेल्या कटाबाबत माहिती हस्तगत करणे, पैशाचा पुरवठा कोणी केला, आणखी या कटात कोण सहभागी आहेत, याचा तपास सुरू आहे. (वार्ताहर)