शिवसेना सत्तेत राहून मनसेला घाबरते - राज ठाकरे

मुंबई, दि. ८ -  शिवसेना सत्तेत राहून मनसेला घाबरत असल्याचं ‌म्हणत राज ठाकरेंनी शिवसेनेवर निशाणा साधला. शिवसेना सरकारविरोधात आहे, असं प्रत्येक वेळी म्हणते, मग सत्तेत का असा सवाल राज ठाकरे यांनी शिवसेनेला केला. तसेच मनसेची गुढीपाडव्याला सभा जाहीर झाल्यानंतर काहींच्या पोटात दुखायला लागले, असा टोलाही शिवसेनेला लगावला आणि जैतापूर आंदोलनाचं काय झालं?, असा खोचक सवाल करत सत्तेत राहून विरोध करण्याचं शिवसेना नाटक करत असल्याची टीकाही राज ठाकरे यांनी यावेळी केली.  हजारो लोक मेले, दंगली झाल्या ज्या मुद्द्यावर भाजप सत्तेत आलं. अमित शाहसुद्धा कोर्टातून सुटले, मग राम मंदिर का सुटत नाही? असं म्हणत करत राज ठाकरेंनी भाजपवर शरसंधान केलं. याचबरोबर त्यांनी  पंतप्रधान नरेंद्र मोदी, शिवसेना, मुख्यमंत्री देवेंद्र फडणवीस यांच्यासह विदर्भाची मागणी करणा-या मा. गो. वैद्य आणि श्रीहरी अणे यांनाही लक्ष्य केलं.