माझ्या नादाला लागू नका, मी अजून...;संजय राऊतांचा केंद्रीय मंत्री नारायण राणेंना इशारा

मला जेलमध्ये घाला, तुमच्या हातात न्यायालय आणि कायदा आहे का? तुम्ही कायद्याचे बाप झालात का? असा सवाल संजय राऊतांनी राणेंना विचारला आहे.

मुंबई - नारायण राणेंवर कुठला अग्रलेख लिहिलाय? नारायण राणेंसारखा डरपोक आणि पळपुटे आम्ही नाही. ईडीची नोटीस येताच पक्ष बदलणाऱ्यांपैकी नाही. कोणाला हिंमतीच्या आणि धाडसाच्या गोष्टी बोलता. मी अजूनपर्यंत त्यांच्यावर काहीच बोललो नाही. एकेकाळी ते आमचे सहकारी होते. धमक्या देऊ नका. धमक्या जर देणार असाल तर राजवस्त्र बाजूला काढा आणि या अशा शब्दात शिवसेना उबाठा गटाचे खासदार संजय राऊत यांनी नारायण राणेंना इशारा दिला आहे. 

संजय राऊत म्हणाले की, माझ्या नादाला लागू नका, राजवस्त्र बाजूला काढा आणि या मग मी दाखवतो. झाकली मूठ सव्वालाखाची. हे काय मला जेलमध्ये पाठवणार, मी हिंमतीने माझ्या पक्षासाठी जेलमध्ये गेलोय. तुमच्यासारखा पळून गेलो नाही. ईडीने बोलवल्यावर शरणागती पत्करली नाही. नामर्द नाही. आम्ही बाळासाहेब ठाकरेंचे शिवसैनिक आहोत असं त्यांनी सांगितले. 

त्याचसोबत मला जेलमध्ये घाला, तुमच्या हातात न्यायालय आणि कायदा आहे का? तुम्ही कायद्याचे बाप झालात का? या सर्वांची माझ्याकडे नोंद आहे. ते सगळं चीफ जस्टीस ऑफ इंडियाला पाठवली आहे. इकडच्या प्रत्येकाचं वक्तव्य़ आम्ही पाठवत आहोत. नारायण राणेंची सगळी आर्थिक प्रकरणं काढली तर ते ५० वर्ष सुटणार नाहीत असा इशाराही संजय राऊत यांनी नारायण राणेंना दिला आहे. 

नारायण राणे, माझ्या नादी लागू नको
नारायण राणे हा पादरापावटा आहे. आतापर्यंत मी त्याच्याबद्दल काही बोललो नाही. सगळ्यांना अरे तुरे करतो तू कोण आहे? याची चौकशी करा. कालपर्यंत मी संयमाने वागलो आता यांची प्रकरणं बाहेर काढतो. मोदींना अरे तुरे बोलत होते. डरपोक लोक आहेत. तुम्ही पळून गेला. किरीट सोमय्यांनी जे आरोप केले त्यावर उत्तर दिले का? नारायण राणे, माझ्या मागे लागू नकोस. तुझ्यासारखे ५६ आले आणि गेले. मर्यादेत राहायचं. नामर्द माणूस आहे. ईडी, सीबीआयच्या भीतीने तू पळून गेलास तुझी लायकी आहे का अशा शब्दात संजय राऊतांनी नारायण राणेंवर प्रहार केला आहे. 

त्याचसोबत नारायण राणे वेड्यांच्या कळपात आहे. त्याची सटकली आहे. त्याला वेड लागलंय. मी त्याला कालपर्यंत आदराने बोलत होतो. त्याच्यावर एकही शब्द बोललो नाही. शिंदे गटातील माणसाला केंद्रीय मंत्रिमंडळात सामावून घेण्यासाठी नारायण राणेंचे मंत्रिपद जातंय. त्यामुळे तो भैसाटला आहे. अजित पवारांनी समर्थक उपमा दिली. त्यांची बुद्धी टिल्लीच आहे. हा प्रश्न शरिरयष्टीचा नसून टिल्ल्या बुद्धीचा आहे. यापुढे जर तो बोलत राहिला तर मी त्याला पूर्ण नागडा करेन. तू ये नाहीतर तुझी पोरं येऊदे. ये मैदानात. केंद्राची सुरक्षा घेऊन फिरतोय. स्वत:ला मोठा भाई समजतो असंही संजय राऊत म्हणाले. 

'त्या' पदाधिकाऱ्यांची नावेही माहिती नाहीत
जे येडेगबाळे पकडतात, पदाधिकारी म्हणून पक्षप्रवेश करून घेतात. नाशिकमधील शिवसेना जशीच्या तशी आहे. २-४ दलाल ठेकेदार तिकडे गेले असतील. जमिनीवरचा शिवसैनिक आणि शिवसेना जागेवरच आहेत. जे कुणी गेलेत त्यांची नावेही नाशिककरांना माहिती नाहीत. मला माहिती नाहीत अशा शब्दात संजय राऊतांनी ५० पदाधिकारी शिंदे गटात प्रवेश करणार असल्याच्या वृत्तावर प्रतिक्रिया दिली. 

संपूर्ण देशाचं पोट मुंबई भरतेय
योगी आदित्यनाथ यांच्याविषयी आम्हाला प्रेम, आदर, ते संत गृहस्थ आहेत. राजकारण बाजूला ठेवा. मुंबईत येऊन ते त्यांच्या राज्यासाठी विकासाची गंगा घेऊन जात असतील तर त्याचे आम्ही स्वागत करतो. चिंताग्रस्त होण्याचं कारण नाही. संपूर्ण देशाचं पोट मुंबई भरतेय. उत्तर प्रदेश, बिहार, ओडिसा असेल या राज्यातील जनता इथं राहतेय त्यांना आम्ही प्रेमानं सांभाळतोय असं संजय राऊत म्हणाले.