Maharashtra Political Crisis: “इथे फक्त शिवसेना, महाराष्ट्रातील जनता शिंदे गटाला मानत नाही”; युवासेनेतील नेत्याने सुनावले

Maharashtra Political Crisis: गाव तिथे शाखा ही संकल्पना राबवत राज्यात उद्धव ठाकरेंच्या पाठीशी मोठी ताकद उभी करेन, असा निर्धार युवासेनेतील नेत्याने व्यक्त केला आहे.

Maharashtra Political Crisis: मुख्यमंत्री एकनाथ शिंदे गटाला (Eknath Shinde) राज्यभरातून वाढता पाठिंबा शिवसेनेसाठी मोठी डोकेदुखी ठरत आहे. शिवसेना पक्षप्रमुख उद्धव ठाकरे (Uddhav Thackeray) पक्ष आणि संघटना वाचवण्यासाठी आटोकाट प्रयत्न करत असल्याचे पाहायला मिळत आहेत. आदित्य ठाकरे (Aaditya Thackeray) हेदेखील राज्यभर दौरे करत आहेत. यातच पडत्या काळात पक्षाची बाजू लावून धरणाऱ्या युवासेनेच्या एका नेत्याने शिंदे गटाला पुन्हा एकदा लक्ष्य केले असून, इथे फक्त आणि फक्त शिवसेना आहे, या शब्दांत सुनावले आहे. 

युवा नेते शरद कोळी यांची युवासेनेच्या राज्य विस्तारकपदी निवड झाल्यानंतर त्यांनी युवासेनेच्या बैठकांचा सपाटा सुरु केला आहे. सोलापूर शहरातील शासकीय विश्रामगृहात शरद कोळी यांच्या अध्यक्षतेखाली युवासेनेची बैठक पार पडली. यावेळी इथे शिवसेनेत कुठला गट-फिट काय नाही. फक्त शिवसेना आहे. उद्धव ठाकरेंच्या पाठीत खंजीर खुपसून शिंदेंनी आपला गट स्थापन केला आहे. महाराष्ट्रातील जनता ही शिंदे गटाला मानत नाही, या शब्दांत कोळी यांनी शिंदे गटावर निशाणा साधला. 

आदित्य ठाकरेंच्या पाठीशी मोठी ताकद उभी करेन

सत्तेसाठी शिवसेनेसोबत गद्दारी करून एकनाथ शिंदे यांनी भाजपबरोबर जाणे पसंत केले. या गद्दारांच्या मानगुटीवर शिवसेना बसणार आहे. त्यांची औकात दाखवणार आहे, अशी बोचरी टीका शरद कोळी यांनी शिंदे गटावर केली. आदित्य ठाकरेंनी माझ्यावर युवासेना राज्य विस्तारकपदाची जबाबदारी सोपवली आहे. गाव तिथे युवासेनेची शाखा ही संकल्पना राबवत राज्यात उद्धव ठाकरे आणि आदित्य ठाकरेंच्या पाठीशी मोठी ताकद उभी करेन, असा निर्धार कोळी यांनी यावेळी व्यक्त केला. 

दरम्यान, शिवसेना संकटात असताना उद्धव ठाकरे यांना साथ देण्याचा इराद्याने शिवसेनेचा भगवा हाती घेतलेल्या सोलापूरच्या शरद कोळी यांच्यावर युवासेनाप्रमुख आदित्य ठाकरे यांनी मागील पंधरा दिवसांपूर्वी मोठी जबाबदारी सोपवली. शरद कोळी यांच्या खांद्यावर आदित्य ठाकरे यांनी युवासेनेच्या राज्य विस्तारकपदाची धुरा सोपवली आहे. शिवसेनेत प्रवेश केल्यानंतर युवा नेते शरद कोळी यांनी बंडखोरांच्या मतदारसंघात जाऊन मोठे शक्तिप्रदर्शन केले. त्याच कामावर खूश होऊन आदित्य ठाकरे यांनी कोळींवर विशेष जबाबदारी सोपवली आहे.