खळबळजनक! निलंबनाच्या भीतीनं एसटी कर्मचाऱ्याचा ह्दयविकाराच्या झटक्यानं मृत्यू

एसटी कर्मचारी अनिल कांबळे यांचा ह्दयविकाराच्या झटक्याने मृत्यू झाला आहे

कोल्हापूर – राज्यातील एसटी कर्मचाऱ्यांच्या संपावर अद्यापही तोडगा निघाला नाही. कर्मचाऱ्यांचा संप बेकायदेशीर असल्याचं कोर्टाने सांगितले आहे. मात्र तरीही कर्मचारी आंदोलनावर ठाम असल्याने महामंडळाने कर्मचाऱ्यांवर निलंबनाची कारवाई केली आहे. आतापर्यंत ९०० हून अधिक कर्मचाऱ्यांना निलंबित करण्यात आलं आहे. तर काही कर्मचारी निलंबनाच्या भीतीने पुन्हा कामावर रुजू होऊ लागले आहेत.

मात्र कोल्हापूरात एसटी कर्मचाऱ्यांच्या संपात दुर्दैवी घटना घडली आहे. याठिकाणी एसटी कर्मचारी अनिल कांबळे यांचा ह्दयविकाराच्या झटक्याने मृत्यू झाला आहे. अनिल यांनी निलंबनाच्या भीतीने गेल्या २ दिवसांपासून अन्न पाण्याचा त्याग केला होता. अनिल कांबळे हे सावंतवाडी आगारात चालक कम वाहक म्हणून कार्यरत होते.

परिवहन मंत्र्यांसोबतच्या बैठकीत तोडगा नाही

परिवहन मंत्री अनिल परब यांच्यासोबत गोपीचंद पडळकर, सदाभाऊ खोत यांच्या नेतृत्वाखाली एसटी कर्मचाऱ्यांच्या शिष्टमंडळाची बैठक पार पडली. या बैठकीत कुठलाही सकारात्मक तोडगा निघाला नाही. या बैठकीबाबत गोपीचंद पडळकर म्हणाले की, आजच्या बैठकीत कोणताही निर्णय झाला नाही. अद्याप संप मागे घेतला नाही. १२ आठवड्यांची मुदत कमी करण्यासाठी सरकारने सकारात्मकता दाखवली आहे. समितीचा अहवाल येत नाही, तोवर सरकार काही करू शकत नाही, अस सरकारच म्हणणं आहे.

तर एसटी कर्मचारी संपावर तोडगा काढण्यासाठी आज बैठक झाली. विलीनीकरनाची मागणी त्यांची आग्रही होती. पण, ती मान्य होऊ शकत नाही कारण हे प्रकरण कोर्टात आहे. १२ आठवड्याचा कालावधी कमी करण्याची मागणी झाली.. त्यावर कालावधी कमी करून अहवाल लवकर देण्याचा प्रयत्न करू असं आश्वासन दिले. सकारात्मक अहवाल आला तर काही करू शकत नाही पण, नकारात्मक अहवाल आला तर शासकीय कर्मचाऱ्यांप्रमाणे वेतन देण्याची मागणीवर विचार करून निर्णय घेण्यास सरकार सकारात्मक आहे. आता ते कर्मचाऱ्यांशी चर्चा करण्यास गेले आहे. सरकारच्या चर्चेची दार उघडी आहेत. एसटी खूप नुकसानात आहेत त्यामुळे संप मागे घ्यावा असं आवाहन परिवहन मंत्री अनिल परब(Anil Parab) यांनी केले.

राज ठाकरेंनी घेतली होती शरद पवारांची भेट

मनसे अध्यक्ष राज ठाकरे(Raj Thakceray) यांनी एसटी कर्मचाऱ्यांच्या मुद्द्यावर राष्ट्रवादीचे प्रमुख शरद पवार (Sharad Pawar) यांची भेट घेतली. या भेटीत एसटी कर्मचाऱ्यांचे शिष्टमंडळही होते. शरद पवारांनीही या मुद्द्यावर सकारात्मक भूमिका घेतली. त्यानंतर परिवहन मंत्री अनिल परब यांनी शरद पवारांची भेट घेतली. एसटी कर्मचाऱ्यांच्या मुद्द्यावर सुवर्णमध्य साधावा अशी सूचना पवारांनी परिवहन मंत्र्यांना दिली. त्यामुळे एसटी कर्मचाऱ्यांचा संप लवकरच संपेल असा विश्वास व्यक्त करण्यात येत आहे.