आत्महत्या करणे मूर्खपणा, हरणा-याची जगात कदर नसते - हेमामालिनींचे वादग्रस्त ट्विट

आत्महत्या करणे हा निव्वळ मूर्खपणा असून त्यामुळे काहीही साध्य होत नाही, असे वादग्रस्त ट्विट हेमामालिनी यांनी प्रत्युषा बॅनर्जीच्या आत्महत्येच्या पार्श्वभूमीवर केले आहे.

ऑनलाइन लोकमत

मुंबई, दि. ५ - टीव्ही कलाकार प्रत्युषा बॅनर्जीच्या आत्महत्येमुळे संपूर्ण सेलिब्रिटी जगात खळबळ माजलेली असतानाच अभिनेत्री व भाजपा खासदार हेमामालिनी यांनी याप्रकरणी वादग्रस्त ट्विट करून नव्या वादाला तोंड फोडले आहे. ' आत्महत्या करणे हा निव्वळ मूर्खपणा असून त्यामुळे काहीही साध्य होत नाही! हे जीवन म्हणजे देवाने आपल्याला दिलेली भेट असून आपण ते मनसोक्त जगले पाहिजे. हे आत्महत्या करून हे जीवन संपवण्याचा आपल्याला कोणताही अधिकार नाही' असे असंवेदनशील ट्विट करत हेमामालिनी यांनी प्रत्युषाच्या आत्महत्येच्या निर्णयावर एका प्रकारे टीकाच केली आहे.

एवढेच नव्हे तर ' मनुष्याने प्रत्येक कठीण परिस्थीवर यशस्वीरित्या मात करणे शिकले पाहिजे. दबावाखाली झुकून प्रयत्न सोडता कामा नयेत. या जगात झुंज देणा-यांची कदर केली जाते, हरणा-यांची नव्हे' असेही त्यांनी आपल्या ट्विटमध्ये म्हटले आहे. 

दरम्यान या ट्विट्समधून हेमामालिनी यांनी मीडियावरही टीकास्त्र सोडले आहे. ' या अशा (आत्महत्येच्या) घटना म्हणजे भुकेलेल्या मीडियासाठी खाद्य असतात. दुसरी एखादी खळबळजनक बातमी मिळेपर्यंत या घटनांचा चावून चोथा केला जातो, मात्र त्यानंतर सगळ्यांनाच याचा विसर पडतो' अशी घणघाती टीकाही त्यांनी केली आहे.

यापूर्वीही हेमामालिनी आपली वक्तव्ये व कृतींमुळे वादात सापडल्या होत्या. नृत्य संस्थेसाठी मिळालेला भूखंड असो वा त्यांच्या गाडीची टक्कर होऊन झालेल्या अपघातात एका चिमुरडीचा गेलेला जीव असो, अनेक वेळा त्या वादात सापडल्या.

 

All these senseless suicides which achieve nothg! Life is God's gift for us to live not for us to take at will. We have no right to do that.

— Hema Malini (@dreamgirlhema) April 4, 2016

One must learn to overcome all odds & emerge successful,not succumb under pressure & give up easily.The world admires a fighter not a loser

— Hema Malini (@dreamgirlhema) April 4, 2016

Just becomes food for the hungry media who chew on news like celebrity suicides until the next sensational news happens.Thn it is forgotten

— Hema Malini (@dreamgirlhema) April 4, 2016