तिसऱ्या आघाडीसाठी जरांगे, आंबेडकर यांच्याशी चर्चा, १७ तारखेनंतर उमेदवार जाहीर करू - संभाजीराजे 

१७ तारखेला आमची पुण्यात बैठक होईल. त्यानंतर आमच्या सर्व जागा जाहीर करू, असेही त्यांनी सांगितले.   

नाशिक : ‘प्रहार’सह शेतकरी संघटनेच्या सहभागातून तिसरी आघाडी महाराष्ट्रासाठी भक्कम पर्याय असून, राज्यातील सर्व जागा लढविण्याची आमची तयारी आहे. यासाठी मी प्रकाश आंबेडकर आणि मनोज जरांगे यांच्याशी चर्चा केली असून, अजूनही त्यांच्या संपर्कात असल्याची माहिती स्वराज्य पक्षाचे अध्यक्ष संभाजीराजे छत्रपती यांनी दिली. 

नाशिक येथे कार्यकर्ता मेळाव्यासाठी आले असता, संभाजीराजे यांनी बुधवारी माध्यमांशी संवाद साधला. ते म्हणाले, फुले-शाहू-आंबेडकरांच्या महाराष्ट्रात त्यांच्या नावाने केवळ राजकारणच सुरू आहे. आता त्यांच्या विचारांचे सरकार स्थापन करण्याची वेळ आली असून, मतदारांना आम्ही एक भक्कम पर्याय देत आहोत. १७ तारखेला आमची पुण्यात बैठक होईल. त्यानंतर आमच्या सर्व जागा जाहीर करू, असेही त्यांनी सांगितले.   

आरक्षण विषय सुटण्यासाठी राजकीय इच्छाशक्ती आवश्यक असून, आम्ही सत्तेत आल्यास त्यावर नक्कीच तोडगा काढू, असा दावाही त्यांनी केला. मायावती यांच्या बसपाचे राज्यातील निरीक्षक सिद्धार्थ यांच्याशीही चर्चा झाल्याचे ते म्हणाले.