अश्लील चाळे करणाऱ्या शिक्षकाला अटक

राष्ट्रीय स्पर्धेत खेळविण्याचे आमिष दाखवून चंदीगढ येथून १३ विद्यार्थ्यांना येथे घेऊन आलेल्या एका क्रीडाशिक्षकाने महिलांच्या कपड्यांची चोरी आणि अल्पवयीन खेळाडूंशी

लोकमत न्यूज नेटवर्क
नांदेड : राष्ट्रीय स्पर्धेत खेळविण्याचे आमिष दाखवून चंदीगढ येथून १३ विद्यार्थ्यांना येथे घेऊन आलेल्या एका क्रीडाशिक्षकाने महिलांच्या कपड्यांची चोरी आणि अल्पवयीन खेळाडूंशी अश्लील वर्तन करण्याचा प्रयत्न केल्याचे उघडकीस आले आहे. याप्रकरणी वजिराबाद पोलिसांनी गुन्हा नोंदवून या क्रीडाशिक्षकाला अटक केली आहे.
सतविंदरसिंघ सिद्धू असे या क्रीडाशिक्षकाचे नाव असून त्याने चंदिगढ येथील १३ अल्पवयीन मुलांना राष्ट्रीय स्पर्धेसाठी घेऊन जात असल्याचे पालकांना सांगून त्यांच्याकडून प्रत्येकी आठ हजार रुपये घेतले़ शुक्रवारी या १३ खेळाडूंसह तो नांदेडात दाखल झाला़ यात्री निवासात या सर्वांच्या राहण्याची व्यवस्था झाली़ रेल्वेप्रवासातच त्याने काही खेळाडूंशी लगट करण्याचा प्रयत्न केला होता़ शुक्रवारी रात्री त्याने यात्री निवासात महिलांचे कपडे चोरण्याचा प्रयत्न केला़ यावेळी तेथील कर्मचाऱ्यांनी त्याला पकडून पोलिसांच्या हवाली केले.
पोलिसांनी यात्री निवासातील सीसीटीव्ही कॅमेऱ्यांची तपासणी केली असता त्यामध्ये सिद्धू हा कपडे चोरताना आणि या अल्पवयीन मुलांशी अश्लील चाळे करण्याचा प्रयत्न करताना आढळला़ या मुलांनी देखील पोलिसांसमोर त्याच्या अश्लील वर्तणुकीचा पाढाच वाचला़ याप्रकरणी वजिराबाद पोलिसांनी सतविंदरसिंघ सिद्धू याच्याविरोधात गुन्हा नोंदविला आहे़ तर, १३ खेळाडूंना परत त्यांच्या घरी पाठविण्याची व्यवस्था गुरुद्वारा बोर्डाच्या वतीने करण्यात येणार आहे़