डॉ. एकनाथ शिंदेंनी ऑपरेशनबद्दल सांगू नये, आम्हाला मुका मार देता येतो; संजय राऊतांचा टोला

ज्यांच्यावर भ्रष्टाचाराचे आणि गैरव्यवहाराचे आरोप आहेत त्यांना डॉक्टरकी कशी देता? असा सवाल राऊतांनी विचारला.

नवी दिल्ली - डॉक्टरांना प्रश्न विचारा, वीर सावरकर कोणत्या बोटीतून उडी मारून कोणत्या बंदरावर गेले? हे आता फोन करून विचारा, ऑपरेशनबद्दल आम्हाला सांगू नका, आम्हाला मुका मार देता येतो. तुम्ही ऑपरेशन करत राहा, तुम्हाला मुका मार बसल्याशिवाय राहणार नाही अशा शब्दात ठाकरे गटाचे खासदार संजय राऊत यांनी मुख्यमंत्री एकनाथ शिंदे यांचा समाचार घेतला आहे. 

खासदार संजय राऊत म्हणाले की, डॉक्टरकी महाराष्ट्रात पायलीला ५० मिळत असतात. प्रत्येक भ्रष्टाचाऱ्याला डॉक्टरेट मिळतेय हा देशाचा अनुभव आहे. अशाप्रकारे डॉक्टरेट देणाऱ्या विद्यापीठाची चौकशी व्हायला पाहिजे. ज्यांच्यावर भ्रष्टाचाराचे आणि गैरव्यवहाराचे आरोप आहेत त्यांना डॉक्टरकी कशी देता? तुमच्या कोणत्या फाईली अडकल्या आहेत म्हणून हे करावे लागते. गेल्या काही वर्षात हा प्रकार वाढला आहे. एकनाथ शिंदे यांनी स्वत:वरच एक शस्त्रक्रिया करायला हवी. सामान्य जनतेने मुख्यमंत्र्यांच्या दालनाबाहेर आत्महत्येचा प्रयत्न केला. त्यात त्यांचा मृत्यू झाला बहुतेक या महान कार्याबद्दलच त्यांना डॉक्टरेट मिळाली असावी.

....अन् सरकार कोसळेल
राष्ट्रवादी प्रदेशाध्यक्ष जयंत पाटील यांनी सुप्रीम कोर्टाचा निकाल लागल्यानंतर सरकार कोसळेल असं विधान केले होते त्यावर प्रतिक्रिया देताना खासदार संजय राऊत म्हणाले की, जयंत पाटील बोलले ते खरे आहे. जर कायद्याने सर्वकाही होणार असेल तर मुख्यमंत्र्यांसह १६ आमदार अपात्र ठरेल आणि सरकार कोसळेल असं त्यांनी सांगितले. 

कर्नाटकात प्रचाराला जाणार 
आगामी काळात कर्नाटकच्या विधानसभा निवडणुका लागणार असून कर्नाटकात महाराष्ट्र एकीकरण समितीच्या प्रचाराला जाऊ. पण माझे राज्यातील सर्व पक्षांना त्यात भाजपा, मिंदे गट आले त्यांना आवाहन आहे की, महाराष्ट्र एकीकरण समितीच्या प्रचाराला अपशकुन करण्यासाठी कुणीही जाऊ नये. तुम्ही महाराष्ट्राचे सुपुत्र असाल तर हे करू नये असं राऊतांनी सांगितले. 

तानाजी सावंतांनाही डॉक्टरेट द्या
जे बाळासाहेबांचा अपमान करतायेत अशा लोकांना घेऊन मिंदे फिरतायेत. हे बाळासाहेबांचे विचार काय पुढे घेऊन जाणार? तानाजी सावंत यांनाही डॉक्टरेट दिली पाहिजे असा टोला खासदार संजय राऊतांनी लगावला.