ठाण्यातील पेट्रोल पंप घोटाळ्याचा सूत्रधार गजाआड

ठाण्यात इलेक्ट्रॉनिक चीपद्वारे पेट्रोलच्या मापात पाप करणारा सूत्रधार प्रशांत नूलकर याला बेड्या ठोकण्यात आल्या आहेत. ठाणे क्राईम ब्रांचनं ही कारवाई केली आहे.

ऑनलाइन लोकमत

ठाणे, दि. 12 -  ठाण्यात इलेक्ट्रॉनिक चीपद्वारे पेट्रोलच्या मापात पाप करणारा सूत्रधार प्रशांत नूलकर याला बेड्या ठोकण्यात आल्या आहेत. ठाणे क्राईम ब्रांचनं ही कारवाई केली आहे. कर्नाटकमधील हुबळीमधून प्रशांत नूलकरला ताब्यात घेण्यात आले.  

इंधन भरण्याच्या यंत्रामध्ये छेडछाड करुन घोटाळा केल्याचे प्रकरण समोर आले होते.  पेट्रोल वेन्डिंग मशिनमध्ये झालेल्या छेडछाडीमुळे ग्राहकाला 4 ते 5 टक्के पेट्रोल कमी मिळायचे. म्हणजेच एका लिटरमागे जवळपास 20 मिलीलिटर इंधनाचा घोटाळा होत होता.  एवढ्या मोठ्या ग्राहकांची फसवणूक सुरू आहे.

 

चिपद्वारे होत असलेली पेट्रोलचोरी पकडण्यासाठी ठाणे क्राईम ब्रांचकडून राज्यभरात धाडसत्र सुरू करण्यात आले आहे. मागील एक महिन्यात ठाण्यातील 98 पेट्रोलपंप सील करण्यात आले. ठाणे क्राईम ब्रांचने मे महिन्यात प्रशांत नूलकरचा साथीदार विवेक शेट्येला अटक केली होती. त्यानेच या चिप देशभरातील पेट्रोल पंपावर पुरवल्या आहेत. प्रशांत नूलकर आणि विवेक शेट्ये यांच्यासह ठाणे पोलिसांनी यापूर्वी सहा जणांना अटक केली आहे.    

 

आणखी बातम्या वाचा

(पेट्रोल पंपावरील कारवाईचा सिलसिला सुरूच, चौघांना अटक)

(घोटाळेबाज पेट्रोल पंपांची संख्या वाढतीच)

(पेट्रोल पंप कर्मचाऱ्यांची कामगार आयुक्त, ‘पीएफ’ कार्यालयाकडे तक्रार)

 

दरम्यान,  ठाणे पोलिसांनी राज्यभर केलेल्या कारवाईमध्ये आतापर्यंत 50 पेट्रोल पंपांची तपासणी करून यापैकी 32 पंपांना सील ठोकले आहे.  आतापर्यंतच्या कारवायांमध्ये 14 आरोपींना अटक करण्यात आली होती. त्यापैकी सात जण न्यायालयीन, तर सात जण पोलीस कोठडीत होते. काही पेट्रोल पंपांच्या डिन्स्पेन्सिंग युनिटमध्ये चिनी बनावटीच्या इलेक्ट्रॉनिक चिप्स पोलिसांना आढळल्या.