मराठा आरक्षणासाठी २४ डिसेंबरला ट्रॅक्टरनं करणार मुंबई चक्काजाम?; पोलीस अलर्ट

मुंबई तसेच राज्यातील कायदा सुव्यवस्था बिघडू नये यासाठी पोलीस अलर्ट झाले आहे.

मुंबई - Maratha Reservation Update ( Marathi News ) जालना येथील अंतरवाली सराटी इथं उपोषण करून मनोज जरांगे पाटील यांनी पुन्हा एकदा मराठा आरक्षणाचा मुद्दा राज्यभरात पेटवला. येत्या २४ डिसेंबरपर्यंत मराठ्यांना आरक्षण द्या या मागणीसाठी गेल्या २ महिन्यापासून जरांगे राज्यभरात दौरा करत सरकारला इशारा देत आहे. त्यातच विधिमंडळाच्या नागपूर हिवाळी अधिवेशनात मुख्यमंत्री एकनाथ शिंदे यांनी राज्य मागासवर्गीय आयोगाने अहवाल दिल्यानंतर फेब्रुवारीपर्यंत मराठा आरक्षणासाठी विशेष अधिवेशन घेऊन असं सांगितले. मुख्यमंत्र्यांच्या या विधानानंतर २४ डिसेंबरपर्यंत आरक्षणावर ठोस निर्णय होण्याची शक्यता धूसर झाली आहे. त्यातच आता राज्यभरातून मराठा आंदोलक २४ तारखेला मुंबईत ट्रॅक्टरनं आणून चक्का जाम करणार असल्याची माहिती हाती लागली आहे. 

राज्याच्या गृहखात्याला मिळालेल्या गोपनीय माहितीनुसार, राज्यात मराठा आंदोलनाच्या पार्श्वभूमीवर २४ डिसेंबरला मुंबई येथे कार्यकर्त्यांचा जमाव होण्याची शक्यता आहे. त्यात हा जमाव जमवण्यासाठी राज्यातून विविध भागातून ट्रॅक्टरही वाहने मुंबई आणली जाणार आहेत. विविध भागातून मुंबई ट्रॅक्टर आणल्यास मुंबईच्या वाहतुकीचा मोठा फटका बसणार असून त्यातून लोकांना वाहतूक कोंडीचा सामना करावा लागेल. त्याचसोबत लोकांची गर्दी जमून जाळपोळ, गाड्या फोडणे, रस्ता अडवणे, टायर जाळणे असे प्रकार करून शांतता भंग केली जाण्याची शक्यता असल्याचं पोलिसांना कळाले आहे. 

त्यामुळे मुंबई तसेच राज्यातील कायदा सुव्यवस्था बिघडू नये यासाठी पोलीस अलर्ट झाले आहे. पोलिसांनी राज्यभरात अनेक ट्रॅक्टर मालकांना १४९ अंतर्गत नोटीस पाठवली आहे. या नोटिशीत म्हटलंय की, आपल्याकडे असलेले ट्रॅक्टर शेतीच्या उपयुक्त कामासाठी घेतलेले आहेत. त्याचा वापर शेतीसाठीच करावा. आपल्याकडे कुणीही मराठा समाजाचे नेते, कार्यकर्ते, नागरीक ट्रॅक्टरच्या मागणीसाठी आल्यास त्यांना ट्रॅक्टर देऊ नये आणि स्वत:ही ट्रॅक्टरसोबत घेऊन जावू नये. आपण त्यांना ट्रॅक्टर पुरवल्यास किंवा घेऊन गेल्यास आरक्षण संबंधाने गर्दी होऊन वाहतुकीस अडथळा निर्माण झाला. त्याचसोबत कुठलीही शांतता भंग करणारी घटना घडल्यास आपल्यावर दखलपात्र गुन्हा दाखल करून सदर ट्रॅक्टर जप्त करण्यात येईल अशी खबरदारीची नोटीस पोलिसांनी बजावली आहे.