खडसेंच्या सुरक्षा ताफ्यातील वाहनावर ट्रक आदळून तीन जखमी

माजी मंत्री आमदार एकनाथराव खडसे यांच्या सुरक्षा  ताफ्यातील एका वाहनावर समोरुन येणारा ट्रक आदळून चालक आणि दोन पोलीस असे तीन जखमी झाले.

जळगाव : माजी मंत्री आमदार एकनाथराव खडसे यांच्या सुरक्षा  ताफ्यातील एका वाहनावर समोरुन येणारा ट्रक आदळून चालक आणि दोन पोलीस असे तीन जखमी झाले. ही घटना  कोथळी (ता. मुक्ताईनगर) बायपासनजीक रविवारी रात्री  पावणेनऊ वाजेच्या सुमारास घडली.   सुदैवाने  खडसे यांचे वाहन अपघात स्थळापासून ५०० मीटर अंतरावर होते.

 जळगावातील कार्यक्रम आटोपून आमदार खडसे हे  रात्री  मुक्ताईनगरकडे  निघाले होते.  त्यांच्या फार्महाऊसनीकच कोथळी बायपासजवळ  मलकापूरकडून जळगावकडे  येणारा ट्रक  सुरक्षा ताफ्यामधील एका वाहनावर आदळला. यात  चालक ज्ञानेश्वर महाजन, हवालदार शशिकांत निकम व  दिनेश ढवळे हे जखमी झाले.  

अपघाताचा आवाज येताच पुढील वाहनात बसलेले खडसे हे  घटनास्थळी आले. त्यांनी  जखमींना  तात्काळ जळगावकडे हलविले. याबाबत रात्री उशिरापर्यंत गुन्हा दाखल करण्याचे काम सुरु होते. ट्रक व चालकास ताब्यात घेण्यात आले आहे. या अपघातात ताफ्यातील वाहन चक्काचूर झाले.