अव्वल बँकर चंदा कोचर

> लक्ष्मीच्या चंचलतेशी व्यूहरचनात्मक पद्धतीनं लीलया खेळू शकलेलं एक नाव भारतभरात अल्पावधीतच प्रसिद्ध झालं. बँकिंगचं क्षेत्र एकेकाळी महिलांच्या कर्तृत्वाला म्हणावी तशी साद घालत नव्हतं. ही परिस्थिती आमूलाग्र बदलण्यात चंदा कोचर यांचा वाटा मोठा आहे. आयसीआयसीआय बँकेच्या प्रगती आणि विस्ताराला आकार देण्याला त्यांची दृष्टी कारणीभूत आहे. आयसीआयसीआय समूहात १९८४ साली दाखल झालेल्या चंदा कोचर यांनी स्वकर्तृत्वाने भरारी घेतली. एकविसाव्या शतकात प्रवेश करताना त्या आयसीआयसीआयच्या संचालक मंडळाचा भाग बनल्या होत्या. तो काळ बोर्डात एक तरी महिला संचालक असली पाहिजे, या तरतुदीचा नव्हता. त्यांचे योगदान त्यांना या सन्मानापर्यंत घेऊन गेले.